لە مانگێکدا نیو ملیۆن فەلەستینی ئاوارەبوون

ئاڤا نیوز

 

ڕێکخراوی نەتەوەیەکگرتووەکان ڕایگەیاند تەنیا لە ماوەی مانگێکدا  نیو ملیۆن  هاووڵاتیی فەلەستینی لە کەرتی غەززە ئاوارە بوون.

 

چیرۆکی سەرەکی: دوای هەڵوەشاندنەوەی ڕێککەوتنی ئاگربەست لەلایەن ئیسرائیل و دەستپێکردنەوەی هێرشە ئاسمانی و زەمینییەکانی بۆ سەر کەرتی غەززە، ڕێکخراوی نەتەوەیەکگرتووەکان دەڵێت، 500 هەزار هاووڵاتی فەلەستینی ناچاربوون و ماڵی خۆیان بە جێبهێڵێن.

 

ڕاگەیێنراوی فەرمی: ڕێکخراوی نەتەوەیەکگرتووەکان ڕایگەیاند: لە 18-3-2025، بەهۆی بەرفراوانی هێرشەکانی ئیسرائیل بۆ سەر کەرتی غەززە 500 هەزار کەس ئاوارەبوون و هەزار و 652 کەس کوژراون.

 

لەلایەکی دیکەوە: ڕێکخراوەکە ئاماژەی بەوەداوە، ناتوانن بەپێی پێویست پێداویستییە سەرەتایییەکان و خۆراک بۆ هاووڵاتییان دابین بکەن، چونکە دوو ملیۆن و 100 هەزار دانیشتووی غەززە بۆ خۆراک پشت بە هاوکاری مرۆیی دەبەستن.

 

ئەوەی پێویستە بیزانیت: ڕۆژی پێنجشەممە  17-4-2025، لە ئەنجامی هێرشێکی  ئاسمانیی ئیسرائیل بۆ سەر خێمەی ئاوارەکان لە خان یونس لە باشووری غەززە، 13 کەس کوژران کە نۆ یان منداڵ بوون و 89 کەسی دیکەش برینداربوون.