گەڕێکی دیکەی دانوستانەکانی نێوان ئەمریکا و ئێران بەڕێوەدەچێت

ئاڤا نیوز

 

ئەمڕۆ دووەم خولی دانوستانە ناڕاستەوخۆکانی شاندی باڵای ئەمریکا و ئێران لە ڕۆمای پایتەختی ئیتاڵیا بەڕێوەدەچێت.

 

وێنە گەورەکە: ڕۆژی شەممە 19-4-2025، گەڕێکی دیکەی دانوستانە ناڕاستەوخۆکانی نێوان ئەمریکا و ئێران بۆ ڕێککەوتن لەسەر بەرنامە ئەتۆمییەکەی ئێران بە نێوەندگیری عومان لە ڕۆمای پایتەختی ئیتاڵیا بەڕێوەدەچێت.

 

ئەوەی پێویستە بیزانیت: شاندی ئێران بە سەرۆکایەتیی عەباس عێراقچی و شاندی ئەمریکا بە سەرۆکایەتیی ستیڤ ویتکۆف، نێردەی تایبەتی دۆناڵد ترەمپ بۆ ڕۆژهەڵاتی ناوەڕاست بە نێوەندگیری بەدر ئەبوسەعدی، وەزیری دەرەوەی عومان  لە ڕۆما کۆدەبنەوە.

 

زانیاریی زیاتر: دوێنێ هەینی دۆناڵد ترەمپ ڕایگەیاند، ''من لەگەڵ ئەوەم کە بە هیچ شێوەیەک نابێت ئێران  چەکی ئەتۆمی هەبێت من ئێرانێکی گەورە و ئاوەدان و نایابم دەوێت''.

 

ئەمەش بزانە: پێشتریش ئەمریکا ئەگەر لەگەڵ ئێران نەگەنە ڕێککەوتنێک سەربارەت بە بەرنامە ئەتۆمییەکەی ئێران ئەوا بژاردەی سەربازی دژی ئەو وڵاتە بەکاردەهێنن، ئێرانیش دەڵێت بەرنامە ئەتۆمییەکەیان هەڕەشە نییە بۆ سەر هیچ وڵاتێک و بەتەواوی دەستبەرداری نابن.

 

باکگراوند: ترەمپ لە یەکەم خولی خۆیدا لە ساڵی 2018 لە ڕێککەوتنی ئەتۆمی ساڵی 2015 نێوان ئێران و شەش وڵاتی  جیهانی کشایەوە و سزای توندی بەسەر تاراندا سەپاند، ترەمپ لەگەڵ گەڕانەوەی بۆ کۆشکی سپی بڕیاری سەپاندنی سیاسەتی "زۆرترین فشار" بۆ سەر ئێران داوە.