لە هێرشێکی ئەمریکا بۆ سەر حووسیەکانی یەمەن 80 کەس کوژران

ئاڤا نیوز

 

حووسییەکانی یەمەن بەرزبوونەوەی ژمارەی قوربانیانی ئەندامەکانی گرووپەکەی بەهۆی ئۆپەراسیۆنە ئاسمانییەکانی دوێنێی ئەمریکا ڕاگەیاند.

 

وێنە گەورەکە: ڕۆژی هەیینی 18-4-2025، فڕۆکە جەنگییەکانی ئەمریکا زنجیرەیەک هێرشی چڕیان بۆ سەر پێگە و بارەگاکانی حووسییەکان لە باشوور و ڕۆژئاوای سەنعای پایتەختی یەمەن و پارێزگاکانی جەوف و سەعدە ئەنجامدا.

 

ڕاگەیێنراوی فەرمی: ڕۆژی شەممە حووسییەکانی یەمەن ڕایانگەیاند: ئەمریکا 15  ئۆپەراسیۆنی سەربازی بۆ سەر ناوچە جیاوازەکانی یەمەن ئەنجامداوە و تەنیا لەو هێرشانە بۆ سەر بەندەری نەوتی ڕاس عیسا کە لەژێر کۆنترۆڵی حوسییەکاندایە،  80 کەس کوژراون و 150 کەسی دیکەش برینداربوون.

 

لەلایەکی دیکەوە: فەرماندەیی ناوەندیی ئەمریکا 'سێنتکۆم' ڕایگەیاند، ئۆپەراسیۆنەکانمان ئامانجیان نەهێشتنی سەرچاوەیەکی سەرەکی داهاتی ئۆپەراسیۆنە سەربازییەکانی  حووسییەکان بووە.

 

قووڵتر: ڕۆژی 15-3-2025، دۆناڵد ترەمپ، سەرۆکی ئەمریکا فەرمانی دەستپێکردنی ئۆپەراسیۆنی  سەربازیی دژی حووسییەکان دەرکرد و هەڕەشەی لە ناوبردنی تەواوی تواناکانی ئەو گرووپەی نزیک لە ئێرانی کرد و وەک بەشێک لە هەوڵەکانی واشنتن بۆ سنووردارکردنی هەڕەشەکانی گرووپەکە بۆ سەر کەشتییەکانی  لە دەریای سوور دانا.