گەڕی دووەمی دانوستاندنی ئێران و ئەمریکا بە نێوەندگیری عومان لە ڕۆما بەرێوەدەچێت

ئاڤا نیوز

 

میدیا ئێرانییەکان ڕایانگەیاند، گەڕی دووەمی دانوستاندنە ناڕاستەوخۆکانی نێوان شاندی ئێران و شاندی ئەمریکا بە نێوەندگیری عومان دەستیپێکردووە.

وێنە گەورەکە: دوای هەفتەیەک لە ئەنجامدانی یەکەم دانوستاندنی ناڕاستەوخۆی نێوان ئێران و ئەمریکا، ئەمڕۆ  شەممە، گەڕی دووەمی دانوستاندنەکان بۆ ڕێککەوتن لەسەر بەرنامە ئەتۆمییەکەی ئێران لە ڕۆمای پایتەختی ئیتاڵیا دەستیپێکرد.

 

زانیاریی زیاتر: دۆناڵد ترەمپ، داوا لە ئێران دەکات کە ڕێککەوتنی  نوێی ئەتۆمی خێراتر بکات بەڵام بۆ ئەوەی هەر ڕێککەوتنێک سەرکەوتوو بێت، تاران دەبێت  ئاماری ئەو کەرستە ئەتۆمییانە ئاشکرا بکات کە هەیەتی بۆ بەرهەمهێنانی چەکی ئەتۆمی.

 

ئەوەی پیویستە بیزانیت: شاندی دانوستاندنی ئێران بە سەرۆکایەتیی عەباس عێراقچی، وەزیری دەرەوەی ئێران و شاندی ئەمریکا بە سەرۆکایەتیی ستیف ویتیکۆف، نێردەی تایبەتی ترەمپ بۆ ڕۆژهەڵاتی ناوەڕاست بە نێوەندگیری بەدر ئەبوسەعدی، وەزیری دەرەوەی عومان لە باڵیۆزخانەی عومان دووەم خولی دانوستاندنەکان دەکەن.

 

باکگراوند: ترەمپ لە یەکەم خولی خۆیدا لە ساڵی 2018 لە ڕێککەوتنی ئەتۆمی ساڵی 2015 نێوان ئێران و شەش وڵاتی  جیهانی کشایەوە، هاوکات سزای تووندی بەسەر تاراندا سەپاند.