سوڵتانی عومان سەردانی ڕووسیا دەکات

ئاڤا نیوز

 

بڕیارە ڕۆژی سێشەممەی داهاتوو سوڵتان هەیسەم بن تاریق، سوڵتانی عومان بە سەردانێکی فەرمیی دوو ڕۆژە بگاتە مۆسکۆی پایتەختی ڕووسیا و لەگەڵ ڤلادیمیر پووتین، سەرۆکی ئەو وڵاتە کۆببێتەوە.

ڕاگەیێنراوی فەرمی: بە گوێرەی ڕاگەیێنراوێکی کۆشکی سەرۆکایەتیی ڕووسیا، کرێملین، سوڵتانی عومان پرسە هەنووکەییەکان و ئەجێندا ناوچەیی و نێودەوڵەتییەکان لەگەڵ پووتین تاوتوێ دەکات. ئەمە سەرەڕای گفتوگۆ دووقۆڵییەکانی نێوانیان سەبارەت بە بوارەکانی بازرگانی، ئابووری، دارایی و وەبەرهێنان.

 

بۆچوونی لایەنی بەرامبەر: دیوانی سوڵتانی عومان لە بەیاننامەیەکدا ڕایگەیاند: ئامانجی سەردانی سوڵتانی عومان بۆ بەهێزکردنی پەیوەندی، هاوکاریی نێوان هەردوو وڵات و تاوتوێ کردنی بەرژەوەندییە هاوبەشەکان و گفتوگۆکردنە لەسەر پرسە هەنووکەییەکان.

ئەوەی پێویستە بیزانیت: عومان نێوەندگیریی دانوستاندنەکانی نێوان ئێران و ئەمریکا دەکات کە گەڕی یەکەمیان لە مەسقەتی پایتەختی عومان بەڕێوەچوو و گەڕی دووەمیشیان لە ئێستادا لە ڕۆمای پایتەختی ئیتاڵیا بەڕێوەدەچن.