ئەنجوومەنی وەزیران بڕیارێک لە بەرژەوەندیی جووتیاران دەدات

ئاڤا نیوز

ئەمڕۆ سێشەممە، لە دانیشتنی ئاسایی خۆیدا، ئەنجوومەنی وەزیران بڕیاریدا ئەو زەوییانەی لە دەرەوەی پلانی کشتوکاڵیی ئەمساڵن، بەرهەمەکانیان هاوشێوەی زەوییەکانی دیکە بە بازاڕ بکرێت.

وێنە گەورەکە: بە وتەی بەرپرسانی کشتووکاڵی، ئەمساڵ نرخی تۆنێک گەنم کە حکومەت وەریدەگرێت بە 850 هەزار دینار بۆ شێوازی چاندنی سەردەمییانە و 800 هەزاریش بۆ گەنمی بەرهەمهاتوو بە ئاوی باران دیاریکراوە، ئەمساڵ ئەو زەوییانەی لە دەرەوەی پلانی کشتوکاڵیین بەهەمان نرخ وەردەگیرێن.

ئەوەی پێویستە بیزانیت: ئەنجوومەنی وەزیران هەمواری پلانی کشتوکاڵیی بۆ ئەمساڵ پەسەند کرد کە بریتییە لە وەرگرتنی بەرهەمی گەنمی ئەو زەوییانەی لە دەرەوەی پلانی كشتوکاڵیین لەلایەن حکومەتەوە، هاوشێوەی ئەو زەوییانەی لەڕووی کۆنترۆڵ و شایستەییەوە لە ناو پلانەکەدا دانراوە.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی هەرێمی کوردستان، بە ئاڤا میدیای ڕاگەیاندووە، بۆ ئەمساڵیش نرخی کڕینی گەنم لە جووتیاران بە دوو جۆر دیاریکراوە، 850 هەزار دینار بۆ هەر تۆنێک گەنم دەدرێتە ئەو جووتیارانەی کە بە شێوازی سەردەمییانە و بە مەڕەشە گەنمیان بەرهەمهێناوە. هەروەها 800 هەزار دیناریش بۆ ئەو جووتیارانە دیاریکراوە کە بە ئاوی باران گەنمیان بەرهەمهێناوە.