دادگای فیدراڵی لەسەر سکاڵای وەزیری دەرەوەی عێراق کارکردن بە یاسایەک ڕادەگرێت

ئاڤا نیوز

لەسەر سکاڵای وەزیری دەرەوەی عێراق و بەهۆی ئەوەی یاساکە زیان بە پێگەی وڵات دەگەیێنێت، دادگای فیدراڵی کارکردنی بە هەمواری یاسای پاسپۆرت بەشێوەیەکی کاتی ڕاگرت.

وێنە گەورەکە: بەگوێرەی هەمواری یاسای پاسپۆرت ژمارە 6ی ساڵی 2025، سەرۆکایەتییەکانی عێراق  وهەرێمەکان، پەرلەمانتار، وەزیر، ڕاوێژکار و ئەندامانی کەرتی دیپلۆماسی کە ژمارەیان بە 50 هەزار کەس مەزەندە دەکرێت، پاسپۆرتی دیپلۆماسی بە خۆیان و خێزان و منداڵەکانیان دەدرێت و تا کۆتایی تەمەنیشیان دەتوانن بەو پاسپۆرتەوە گەشت بکەن.

ڕاگەیێنراوی فەرمی: دادگای فیدراڵی بڵاویکردەوە، فوئاد حوسێن، وەزیری دەرەوەی عێراق لەسەر هەمواری یاسای پاسپۆرت سکاڵای لەسەر سەرۆکی پەرلەمانی عێراق تۆمارکردووە و ئاماژەی بەوەکردووە، هەمواری یاساکە پێچەوانەی دەستوور و یاساکانی تایبەت بەم بوارەیە و ئەگەر جێبەجێ بکرێت، زیانێکی زۆر بە پێگە و ڕیزبەندی پاسپۆرتی عێراق لەنێوان وڵاتانی جیهان دەگەیێنێت و بەئاسانیش زیانەکە قەرەبوو ناکرێتەوە، بۆیە داوای کردووە فەرمانێکی سالاریی دەربکرێت و کارکردن بە یاساکە ڕابگیرێت.

- دوای سەیرکردنی سکاڵاکەی وەزیری دەرەوە بۆیان دەرکەوت سکاڵاکە پێویستی بەوەیە فەرمانی سالاری بۆ دەربکرێت، بۆیەش بە کاتی کارکردن بە یاساکەیان ڕاگرت، هەرچەندە ئەم ڕێکارە لەناو دەستوور و یاسای دادگاکەشدا ئاماژەی پێنەکراوە.