نێچیرڤان بارزانی: فرەیی ئایینی سەرچاوەی هێز و سەقامگیرییە بۆ هەرێمی کوردستان

ئاڤا نیوز

سەرۆکی هەرێمی کوردستان پێیوایە، فرەیی ئایینی و کولتووری لە کوردستان هەرگیز بارقورسیی نەبووە، بەڵکو سەرچاوەی هێز و سەقامگیری و هەمیشە جێی شانازیمان بووە. بە درێژایی ساڵان هەرێمی کوردستان سەلماندویەتی  کە نموونەیەکی واقیعییە لە ڕێزگرتن لە فرەیی و پاراستنی ئازادییە ئایینییەکان و دروستکردنی ژینگەیەکی ئارام بۆ هەموو پێکهاتە جیاوازەکان لە هەر ئایین و نەتەوەیەک بن لە هەرێمی کوردستان.

چیرۆکی سەرەکی: ئەمڕۆ چوارشەممە 23-4-2025، بە دەستپێشخەری سەرۆک بارزانی، بۆ یەکەمجار لە هەولێر، 'ڕۆژی نزای نیشتمانی' بەڕێوەچوو، کە هەموو پێکەوە لە کەشێکی ڕۆحانیدا نزا بۆ هەرێمی کوردستان دەکەن و ڕێوڕەسمەکە تاوەکو ڕۆژی هەینی 25-4-2025، بەردەوام دەبێت.

لێدوانی فەرمی: نێچیرڤان بارزانی، سەرۆکی هەرێمی کوردستان لە ڕۆژی نزای نیشتمانی ڕایگەیاند: زیندووترین نموونەی کولتووری و فرەیی و پێکەوەژیان و لێبووردەیی لە کوردستان ئەوەبوو، کاتێک ساڵی 2014، هاووڵاتیانی ئێزدی و مەسیحی لەسەر دەستی تیرۆریستیانی داعش ڕووبەڕووی جینۆساید بوونەوە. لە بادینان بە تایبەتی و لە زۆر شوێنی دیکەی کوردستانیش دەرگای مزگەوت و قوتابخانەکان بۆ ئاوارەکان کرانەوەو هەموو هاوکاری و یارمەتییەکیان پێشکەش کرا.

لێرە لە هەرێمی کوردستان لە لانکەی لێبووردەیی و پێکەوەژیان پێشوازیان لێکرا و حەوێنرانەوە. هەموو ئەمانەش لەسەر فەرمانی ڕاستەوخۆی جەنابی سەرۆک مەسعود بارزانی ئەنجام دران. وایلهێات هەرێمی کوردستان پێشوازی لە سەرووی دوو ملیۆن ئاوارەو پەنابەر بکات و ڕێژەی دانیشتوانی هەرێمی کوردستان 33٪ زیادی کرد، ئێستاش حاڵی حازر نزیکەی یەک ملیۆن ئاوارە و پەنابەر هەن، خۆشبەختانە نە ئەوساو نە ئێستا هیچ کێشەو ڕووداوێکی ئەمنی و کۆمەڵایەتی ڕووینەداوە. ئێستاش ئەوانەی گەڕاونەتەوە شوێنی خۆیان یادگاری خۆشیان لە هەرێمی کوردستان هەیەو بەردەوام بە سەردان دێنەوە ئێرە.

ئێمە باوەڕمان وایە بەهێزکردنی ئاشتی لە باوەڕی قووڵەوە بە بەهای مرۆڤ و بە ڕێزگرتن لە شکۆی مرۆڤایەتی بەبێ جیاوازی سەرچاوە دەگرێت، ئەم بەهایانە کاتێک تەواو جێگیر دەبن کە لە سیاسەتە گشتییەکان، پەروەردە، دادپەروەری و هاوکاری نێوان ئایین و کەلتوورەکاندا پشتگیریان هەبێت و بە بڕوا کاریان پێ بکرێت. ئێمەش لە هەرێمی کوردستان بە جیددی و بێ ڕاوەستان کاریان بۆ دەکەین.

ئەزموونەکان و مێژوو سەلماندوویەتی گفتوگۆی ڕاستگۆیانە باشترین ڕێگەیە بۆ چارەسەرکردنی ناکۆکییەکان و بەهێزکردنی متمانە لەنێوان خەڵکەوە. لێرەوە ئێمە ئەم چالاکییەی ئەمڕۆ لە هەولێر دەکرێت بە هەنگاوێکی جیددی دەزانین بەرەو چەسپاندنی زیاتری کەلتووری لێکتێگەیشتن و ڕێز لە یەکتر گرتن. هەروەها پەیامێکە لە کوردستانەوە لە هەولێرەوە بۆ جیهان، کە دەڵێت فرەیی هەڕەشە نییە، بەڵکو سەرچاوەی دەوڵەمەندییە و کۆمەڵگا دەتوانن بە ئارامی و شکۆ پێکەوە بژین کاتێک لەسەر متمانە و کرانەوە بوونیاد دەنرێن.