گەڕی سێیەمی دانوستانەکانی ئەمریکا و ئێران کۆتایی هات

ئاڤا نیوز

کۆبوونەوەی تیمە تەکنیکی و پسپۆرەکانی ئێران و ئەمریکا و گفتوگۆ سیاسییەکانی نێوان ئەو دوو وڵاتە دوای نۆ کاتژمێر کۆتاییهات، میدیا ئێرانییەکانیش دەڵێن، ئەنجامی کۆبوونەوەکە ئەرێنی بووە.

چیرۆکی سەرەکی: ئەمڕۆ شەممە گەڕی سێیەمی کۆبوونەوەی تیمە تەکنیکی و پسپۆرەکانی ئێران و ئەمریکا بە سەرۆکایەتی ماجید تەخترەوانچی و کازم غەریبابادی، جێگرانی وەزیری دەرەوەی ئێران و هەروەها مایکل ئەنتۆن، بەرپرسی پلاندانانی سیاسەت لە وەزارەتی دەرەوەی ئەمریکا بەڕێوەچوو.

هاوکات گفتوگۆ سیاسییەکانی نێوان ئەو دوو وڵاتە لەلایەن عەباس عێراقچی، وەزیری دەرەوەی ئێران و ستیڤ ویتکۆف، نوێنەری تایبەتی ترەمپ بۆ ڕۆژهەڵاتی ناوەڕاست سەرۆکایەتی کراوە، کۆبوونەوەکان بۆ ماوەی نۆ کاتژمێر بەردەوام بوون.

زانیاریی زیاتر: شاندی هەردوولا گەڕاونەتەوە بۆ وڵاتەکانیان بۆ ڕاوێژکردن لەسەر ئەو تەوەرانەی لە کۆبوونەوەکەدا باسکراون.

لێدوانی فەرمی: بەدر بوسەعیدی، وەزیری دەرەوەی عومان ڕایگەیاند، گفتۆکانی ئەمڕۆی نێوان ئەمریکا و ئێران جەختی لەسەر خواستی هاوبەش بۆ گەیشتن بە ڕێککەوتنێک لەسەر بنەمای ڕێزگرتنی یەکتر و بەڵێنی هەمیشەیی کردەوە، لە کۆبوونەوەکەشدا بابەتە سەرەکییەکان و نیگەرانییەکانی هەردوولا خراونەتە سەر مێزی گفتوگۆ، کۆبوونەوەی داهاتوو لە ڕۆژی شەممە ئەنجام دەدرێت.