ئاسانکاری بۆ کەسوکاری شەهیدان و ئەنفالکراوانی ناوچە کێشەلەسەرەکان دەکرێت

ئاڤا نیوز

 

لە كەركووك كار بۆ سوودمەندبوونی كەسوكاری شەهیدان و ئەنفالكراوان دەكرێت لە سەرجەم ئەو ماف و ئیمتیازاتانەی بەپێی یاسا بۆیان دابین كراوە، بەتایبەت وەرگرتنی كوڕ و كچی شەهیدان لە خوێندنی باڵا و لێخۆشبوونیان لە نیوەی كرێی خوێندنی زانكۆ ئەهلییەكان و خوێندنی ئێواران.

 

ئەوەی پێویستە بیزانیت: كەسوكاری شەهیدان و ئەنفالكراوان لە ناوچە كوردستانییەكانی دەرەوەی ئیدارەی هەرێمی كوردستان، تا ئێستا لە هیچ جۆرە ماف و ئیمتیازێك سوودمەند نین كە بە یاسا بۆیان چەسپێنراوە.

 

چیرۆكی سەرەكی: شاندێكی حكومەتی فیدڕاڵی كە پێكهاتبوون لە ڕاوێژكاری سەرۆكوەزیرانی عێراق بۆ كاروباری شەهیدان و بەڕێوەبەری دەزگای شەهیدان، لەسەر داوای ئیدارەی خۆجێیی كەركووك، سەردانی پارێزگای كەركووكیان كرد و لەگەڵ پارێزگاری شارەكە كۆبوونەوە.

 

لێدوانی فەرمی: د. ڕێبوار تەها، پارێزگاری كەركووك لە كۆنفرانسێكی ڕۆژنامەوانیدا ڕایگەیاند، كەسوكاری شەهیدان، بەدیاریكراویش كەسوكاری شەهیدانی پێشمەرگە و ئەنفالكراوان لە كەركووك و ناوچە كوردستانییەكانی دیكەی دەرەوەی ئیدارەی هەرێم، بێبەشن لە سەرجەم ئەو ماف و ئیمتیازاتانەی كە بە یاسای ژمارە 2ـی ساڵی 2016، بۆ كەسوكاری شەهیدان، بڕیاری لەسەر دراوە.

 

خاڵە ئەرێنییەكان: لەم كۆبوونەوەیە بڕیاردرا ئاسانكاریی پێویست بكرێت بۆ سوودمەندبوونی كەسوكاری شەهیدانی ناوچە كێشەلەسەرەكان لە ماف و ئیمتیازەكان، هەوڵیش بدرێت بۆ نەهێشتنی ئەو ئاڵۆزییەی لەنێوان وەزارەتی شەهیدان و ئەنفالكراوانی هەرێمی كوردستان و بەڕێوەبەرایەتییەكانی شەهیدانی حكومەتی فیدڕاڵی هەیە، لەپێناو هەماهەنگیكردن و لابردنی ئاستەنگەكانی بەردەم سوودمەندنەبوونی كەسوكاری شەهیدان لەو ماف و تایبەتمەندیانە.

 

بابەتە ستراتیژییەكە: تەرخانكردنی كورسیی خوێندنی باڵا بەڕێژەی 10% بۆ كچ و كوڕی شەهیدان بەبێ بەرامبەر لە زانكۆ حكومییەكان و لێخۆشبوون لە 50%ـی كرێی خوێندن لە زانكۆ ئەهلییەكان و خوێندنی ئێواران، بابەتی سەرەكی كۆبوونەوەكە بوو.