زیاد جەبار: دەیان خەڵكی سەرسەری لە دەزگا ئەمنییەكانی یەكێتی هەن

ئاڤا نیوز

بەرپرسی مەڵبەندی یەکێتی لە سلێمانی ڕایدەگەیەنێت، جێی نیگەرانییە دەیان خەڵكی سەرسەری و بێ مۆڕاڵ ئێستا لەنێو دەزگا ئەمنییەكانی یەكێتی هەن.

چیرۆكی سەرەكی: زیاد جەبار، بەرپرسی مەڵبەندی یەكێتیی نیشتمانی كوردستان لە سلێمانی، لە كۆبوونەوەیەكی حیزبیدا قسە بۆ ئەندام و لایەنگرانی ئەو حیزبە دەكات و دەڵێت، "لەم دواییانەدا گلەیی و تێبینی زۆر لەسەر دەزگا ئەمنییەكانی یەكێتی دروستبووە.

لێدوانی فەرمی: زیاد جەبار ڕایگەیاند، "لە سلێمانی دەزگا ئەمنییەكانی سەر بە یەكێتی دەسكەوتی گرنگیان هەبووە و بەهەبوونی كەسانی تێكۆشەر و خاوەن مێژوو، جێی شانازی بوونە، بەڵام بەداخەوە لەم دواییانە گلەیی و تێبینی زۆر لەسەر ئەو هێزانە هەیە و لە پاڵ خەڵكانی دڵسۆز، بە دەیان خەڵكی سەرسەری و بێ مۆڕاڵ هاتوونەتە نێو هێزەكان."

- هەبوونی ئەوجۆرە كەسانە لەناو دەزگا ئەمنییەكان، زیانی گەورەی بە پێگەی یەكێتی لەنێو خەڵك گەیاندووە و دەگەیەنێت، لەو چوارچێوەیەدا بەپێویستی زانی؛ ئەو پرۆسە چاكسازییەی یەكێتی بەنیازە ئەنجامی بدات و گۆڕانكاری لە دامەزراوەكانیدا بكات، دەبێت بە پلەی زۆرتر لەنێو هێزە ئەمنییەكان بكرێت و ئەو هێزانە لەوجۆرە كەسانە پاكبكرێنەوە.

- ئێستا سەركردایەتی یەكێتی لەبەردەم دووڕیانێك دایە؛ یان ئەوەتا شاری سلێمانی بەتەواوی ببێتە شارێكی عەسكەرتاری و گرووپی چەكداری، یانیش ئەوەتا شكۆ و ڕێز بۆ ئەو هێزە چەكدارانە دەگەڕێندرێتەوە و دیاردەی چەكداری و هەڵكووتانە سەر خەڵك و مافیاگەری بنبڕدەكرێت.

ئەوەی پێویستە بیزانیت: ئێوارەی ڕۆژی 26ـی ئەم مانگە، هێزەكانی ئۆپەراسیۆنی یەكێتیی هێرشیان كردە سەر بەرپرسی مەڵبەندی یەكێتی لە سلێمانی و پاسەوانەكانی، شەڕەکەش بە بۆکس و شەق و چەقۆ بوو، بەهۆیەوە دوو پاسەوانی زیاد جەبار بریندار بوون.