ئەنجوومەنی وەزیران بەسەرپەرشتی مەسرور بارزانی لەبارەی دوو تەوەر کۆبووەوە

ئاڤا نیوز

 

ئەنجوومەنی وەزیرانی هەرێمی کوردستان بەسەرپەرشتی سەرۆکوەزیران مەسرور بارزانی لەبارەی هەناردەکردنەوەی نەوتی هەرێمی کوردستان و مووچەی خانەنشینان کۆبووەوە.

ئەوەی پێویستە بیزانیت: ئەنجوومەنی وەزیرانی کوردستان لیژنەیەکی تایبەتمەندی بۆ خەرجکردنی مووچە و شایستەکانی خانەنشینان پێکهێنا. هەروەها وەزارەتەکانی دارایی، پێشمەرگە و ناوخۆی ڕاسپارد، بەزووترین کات لیژنەی تایبەتمەندی هاوبەش پێکبهێنن بۆ دانانی ڕێکار و میکانیزمیی گونجاو بۆ ئاسانکاریی لە زوو بەجێگەیاندنی ڕێکارەکانی خانەنشینی و خەرجکردنی مووچە و شایستەکانی خانەنشینانی هەرێمی کوردستان لە کەرتەکانی مەدەنی و سەربازیی و هێزەکانی ئاسایشی ناوخۆ، بەجۆرێک کە ڕاییکردنی مامەڵەکانی خانەنشینی و خەرجکردنی شایستەکانیان وەکو شەش مووچەکەی پاداشتی خانەنشینی دوا نەکەوێت.

ئەمەش بزانە: لەبارەی هەناردەکردنەوەی نەوت، ئەنجوومەنی وەزیران دووپاتی کردەوە، هەرچی زووە دەستپێکردنەوەی هەناردەی نەوتی کوردستان دەست پێبکات و حکومەت پابەندییەکانی خۆی بەتەواوی جێبەجێ کردووە و هیچ ئاستەنگ و بەربەستێکیش لەلایەن هەرێمی کوردستانەوە نییە.

لەلایەکی دیکەوە: ئەنجوومەنی وەزیران هەڵوێستی نەگۆڕی خۆی بۆ پشتیوانيی دانوستان و گفتوگۆکانی نێوان هەردوو وەزارەتی نەوت و سامانە سرووشتییەکان دووپات دەکاتەوە بۆ هەرچی زوو دەستپێکردنەوەی هەناردەکردنەوەی نەوت. 

بەزووترین کات لیژنە پێكبهێنرێت بۆ بەجێگەیاندنی رێکارەکانی خانەنشینی
هیچ ئاستەنگ و بەربەستێک لەلایەن ئێمەوە نییە بۆ دەستپێكردنەوەی هەناردەی نەوت