کرێکاران لە ساڵێکدا نزیکەی 230 سکاڵایان لەسەر خاوەنکارەکان تۆمار کردووە

ئاڤا نیوز

 

بەگوێرەی ئامارەکان کرێکاران نزیکەی 230 سکاڵایان لەسەر خاوەنکارەکان لە پارێزگاکانی هەرێمی کوردستان تۆمارکردووە.

 

وێنە گەورەکە: لە هەرێمی کوردستان 193 هەزار و 768 کرێکار دەستەبەرکراون، 165 هەزار و 464 کرێکاری ناوخۆیی و 28 هەزار و 300 کرێکاری بیانین، هەروەها 55 هەزار و 456 پرۆژەش دەستەبەر کراون.

 

چیرۆکی سەرەکی: کرێکاران ڕۆژانە لەکاتی کارکردن لە سێکتەرە جیاواز و باڵەخانەکاندا لە پارێزگاکانی هەرێمی کوردستان، تووشی ڕووداوی نەخوازراو دەبنەوە و بەشێکیان گیانیان لەدەست دەدەن، بەشێکیشیان بە سەختی بریندار دەبن.

 

لێدوانە فەرمییەکان: ئاڤا میدیا ئاماری گیانلەدەست دان و برینداربوونی کرێکاران لە سێ پارێزگای هەرێمی کوردستان ئاشکرا دەکات:

 

-چالاک ڕەئووف، سەرۆکی سەندیکای کرێکاران- لقی سلێمانی بە ئاڤای ڕاگەیاند: ساڵی ڕابردوو لە سلێمانی 23 کرێکار گیانیان لەدەست داوە، دەیان کرێکاریش لە کاتی کارکردندا بریندار بوون، لە چوار مانگی ڕابردووشدا چوار کرێکار گیانیان لەدەست داوە.

 

- حەسەن ڕەمەزان، وتەبێژی سەندیکای کرێکاران- لقی هەولێر بە ئاڤای گوت: ساڵی ڕابردوو لە هەولێر 9 کرێکار گیانیان لەدەست داوە، کە دووانیان کرێکاری بیانی بوون، لە چوار مانگی ڕابردووشدا یەک کرێکار گیانی لەدەست داوە و دەیان چەند کرێکاریش بریندار بوون.

 

- لە ماوەی چوار مانگی ڕابردوودا لە دهۆک، سێ کرێکار گیانیان لەدەست داوە و کەسێکیش بەهۆی سەختی برینەکەیەوە کەمئەندام بووە. وەڵات ئۆزمان، سەرۆکی سەندیکای کرێکاران- لقی دهۆک وای گوت. 

 

ئەوەی پێویستە بیزانیت: مەریوان بەگۆک عەزیز، بەڕێوەبەری گشتیی کار و دەستەبەری کۆمەڵایەتی بە ئاڤای ڕاگەیاند: ساڵی ڕابردوو نزیکەى 230 سکاڵا لەلایەن کرێکارانەوە تۆمار کراوە و کێشەکانمان چارەسەر کردوون، هەر کاتێکیش خاوەنکار مافی کرێکارەکان نەپارێزیت ئەوا بە پێی یاسای کار تووشی سزا دەبێت.

 

ئەمەش بزانە: حکومەتی هەرێمی کوردستان لە هەوڵدایە زۆرترین دەرفەتی کار بۆ هاووڵاتیان بڕەخسێنێت و دەستی کاری بیانی کەمتر ببێتەوە، هەروەها بە بڕیاری ژمارە 172ـی ئەنجوومەنی وەزیرانی هەرێمی کوردستان، دەبێت 75٪ی دەستی کاری پرۆژەکان کرێکاری ناوخۆیی بن.