سوودانی: ئامادەبوونی ئەحمەد شەرع لە لووتکەی عەرەبی گرنگە

ئاڤا نیوز

سەرۆکوەزیرانی عێراق ئاشکرای دەکات، ئامادەبوونی ئەحمەد شەرع لە لووتکەی داهاتووی کۆمکاری عەرەبی لە بەغدا، گرنگییەکی تایبەتی دەبێت و دەڵێت، "شەرع دیدگای نوێی سووریا بۆ وڵاتانی عەرەبی ڕووندەکاتەوە".

وێنە گەورەکە: بڕیارە 17-5-2025 عێراق میوانداری کۆبوونەوەی لووتکەی عەرەبی لەبەغدا بکات، وێڕای ناکۆکییە سیاسییەکان لە بەشداریکردنی ئەحمەد شەرع، ڕۆژی 27-4-2025 حکومەتی عێراق بە فەرمی وەک سەرۆککۆماری سووریا بانگهێشتی لووتکەکەی کرد.

لێدوانی فەرمی: محەممەد شیاع سوودانی، سەرۆکوەزیرانی عێراق لە بەرنامەیەکی تەلەفزیۆنیدا ڕایگەیاند: عێراق هەموو هەوڵێک دەخاتە گەڕ بۆ پاڵپشتیکردنی سووریا و ڕێزگرتن لە ئیرادەی گەلەکەی و بەشداریکردن لە پرۆسەی ئاوەدانکردنەوەدا.

- زۆربەی وڵاتانی عەرەبی ئومێدەوارن سووریا بەسەر ئەو سەختییانە زاڵ بێت کە دەیان ساڵە بەدەستییەوە دەناڵێنێت.

- عێراق گرنگی بە پاراستنی ئاسایشی سووریا دەدات، چونکە بەشێکی سەرەکی ئاسایشی نەتەوەیی عێراقە.

- چاوەڕوانی پرۆسەیەکی سیاسی گشتگیرین لە سووریا کە لەسەر بنەمای هاوڵاتیبوون و ڕێزگرتن لە مافەکانی مرۆڤ و نەهێشتنی توندڕەوی و تیرۆر دابمەزرێت.

- داعش تاوەکو ئێستا لە سووریا چالاکە، بەتایبەت دوای گۆڕانکارییە سیاسییەکانی ئەم دواییەی لەناوچەکەدا ڕوویدا.