نەتەوە یەکگرتووەکان هۆشداریی "قڕبوون"ـی خەڵکی غەززە دەدات

ئاڤا نیوز

شارەزایانی نەتەوە یەکگرتووەکان ڕایانگەیاند، وڵاتانی جیهان لەبەردەم بەرپرسیارێتییەکی ئەخلاقیدان و کەوتوونەتە دووڕیانێکەوە کە دوو هەڵبژاردەیان لەبەردەمە یان کارکردن بۆ وەستانی تووندتیژییەکانی ئیسرائیل لە دژی خەڵکی غەززە یان شایەتی قڕبوونی خەڵکی فەلەستین بن لە سەر خاکەکەیان.

ڕاگەیێنراوی فەرمی: لە بەیاننامەیەکدا زیاتر لە 20 شارەزای سەربەخۆیی نەتەوە یەکگرتووەکان ڕایانگەیاند، "بڕیارەکە ڕوونە؛ یان دەبێت بێدەنگ بین و تەماشای کوشتنی خەڵکی بێتاوان بکەین، یاخود بەشداریی لە دروستکردنی چارەسەرێکی دادپەروەرانە بکەین".

ئەوەی پێویستە بیزانیت: ئەم بەیاننامەیە لە کاتێکدایە کە ئیسرائیل لە هێرشەکانی بۆ سەر کەرتی غەززە و بە ئامانجگرتنی دانیشتوانەکەی بەردەوامە. تائێستا ئیسرائیل زیاتر لە 52 هەزار فەلەستینی لە کەرتی غەززە کوشتووە و گەمارۆیەکی تووندی خستووەتە سەر کەرتەکە و ڕێگە بە چوونە ناوەوەی هیچ جۆرە خۆراک و یارمەتییەکی مرۆیی نادات.