وردەکاریی پلەبەرزکردنەوەی فەرمانبەران؛ چەند هەزار فەرمانبەر ئەگرێتەوە؟

ئاڤا نیوز

 

ئەنجوومەنی وەزیرانی هەرێمی كوردستان، نووسراوێک ئاڕاستەی وەزارەتی دارایی و ئابووریی هەرێمی کوردستان دەكات و تێیدا داوا دەکات ڕێکكارەكانی ڕێكخستنەوەی بەرزكردنەوەی پلەی فەرمانبەرانی هەرێمی کوردستان بكات.

چیرۆکی سەرەکی: سەرۆكایەتیی دیوانی ئەنجوومەنی وەزیرانی هەرێمی كوردستان نووسراوێكی ئاراستەی وەزارەتی دارایی و ئابووریی هەرێمی كوردستان كردووە و ناوەڕۆكەكەی بریتییە لە ڕێكخستنەوەی پلە بەرزكردنەوەی فەرمانبەرانی هەرێمی كوردستان.

نووسراوی فەرمی: نووسراوەكە ڕێككەوتی 27ی4ی ئەمساڵ بە ژمارە 4920 ئاڕاستەی وەزارەتی دارایی كراوە و نووسراوێكی دارایی عێراقی هاوپێچ كراوە و داوای ڕێكخستنەوەی ڕێككارەكانی پلە بەرزكردنەوەی فەرمانبەران بە ڕەچاوكردنی بنەماكانی پەیڕەوكراو لەلایەن حكومەتی فیدڕاڵ و بڕیارەكانی ئەنجوومەنی وەزیرانی هەرێمی كوردستان لەمبارەیەوە دەكات.

 

یاسا و ڕێنماییە تازەکان و مەرجەکانی پلەبەرزکردنەوەی فەرمانبەرانی هەرێمی کوردستان بەم شێوازەیە:-
 

یەکەم: هەبووونی پلەی بەتاڵ یان وەزیفەی بەتاڵ لە پلەیەکی بەرزتر لەو پلەیەی کە تێیدایە لەنێو میلاکی وەزیفی فەرمانگەکەی. 

دووەم: تەواوکردنی ماوەی بڕیاردراو بۆ پلە بەرزکردنەوە. 

سێیەم: دەبێت فەرمانبەر مەرجەکان و توانای پێویستی هەبێت بۆ ئەو وەزیفەیەی بۆی کاندید دەکرێت بۆ پلە بەرزکردنەوە، واتا شایستە بێت.

چوارەم: سەلماندنی تواناکانی فەرمانبەر بۆ وەرگرتنی ئەو وەزیفەیەی کە نیاز وایە پلەکەی بۆی بەرز بکرێتەوە بە راسپاردەی سەرۆکی راستەوخۆ و پەسندکردنی سەرۆکی باڵا.

ئەوەی پێویستە بیزانیت: زیاتر لە 10 ساڵە پلەبەرزكردنەوەی فەرمانبەرانی شارستانی لە هەرێمی كوردستان وەستاوە.

 

زانیاریی ئاڤا: سەرەتا پێویستە پلەی وەزیفی ڕێکبخرێتەوە بەپێی یاسای ژمارە 19ی ساڵی 2024، دواتر دەست بە پلەبەرزکردنەوە بکرێت.

- حکومەتی عێراق و کوردستان بە هەماهەنگی لەگەڵ یەکتر لە سەرەتای ئەمساڵەوە دەستیان بەم پرۆسەیە کردووە، ناونیشانی فەرمانبەرانیان ڕێکخستووەتەوە و ئەم بابەتە چارەسەر کراوە.

زانیاریی زیاتر: لە هەرێمی کوردستان پێداچوونەوە و ڕێکخستنەوەی ناونیشانی وەزیفی 550 هەزار فەرمانبەری گرتووەتەوە، بەڵام پلەی هەموویان بەرز ناکرێتەوە.

- ئاڤا زانیویەتی پلەبەرزکردنەوە 330 هەزار فەرمانبەر دەگرێتەوە، بەڵام مەرج نییە پلەی هەموویان بەرزبکرێتەوە و بەگوێرەی پێویستی دەبێت، بابەتەکەش ئاڵۆزە و کاتێکی زۆری دەوێت.


- لەگەڵ بەرزکردنەوەی پلەی وەزیفی هەر فەرمانبەرێک، مووچە و ئیمتیازاتیشی زیاد دەکات.