گەنمەکەی عێراق تونسییەکان نیگەران دەکات

ئاڤا نیوز

عێراق 50 هەزار تۆن گەنم وەک هاوکاری ڕەوانەی تونس دەکات، ئۆپۆزسیۆن ئەو وڵاتەش نیگەرانە و دەڵێت" ئەو بڕە گەنمە بەرامبەر بەشداربوونی سەرۆککۆمارە لە لووتکەی عەرەبی بەغدا ".

 

چیرۆکی سەرەکی: لە چوارچێوەی پاڵپشتیکردنی وڵاتانی عەرەبی، ئەنجوومەنی وەزیرانی عێراق بڕیاریدا بڕی 50 هەزار تۆن گەنم وەک هاوکاری ببەخشێتە تونس. 

 

ڕاگەیێنراوی فەرمی: وەهاب هانی، سەرۆکی پارتی مەجد لەژێر مانشێتی "گەنم لە بەرامبەر ئامادەبوون و بەشداریکردن" نووسیویەتی: "ئەنجوومەنی وەزیرانی عێراق لە سەروبەندی لووتکەی عەرەبی کە بڕیارە 17 -5-2025 لە بەغدا بەڕێوەبچێت، 50 هەزار تۆن گەنمی بەخشییە تونس، بۆ ئەوەی قەیس سعەیید، سەرۆککۆماری تونس خودی خۆی وەک بەرزترین ئاستی دیپلۆماسی وڵاتەکەی ئامادەبێت .

 

لەلایەکی دیکەوە: ماهر عەباسی، سەرۆکی پێشووی پارتی "تەحیا تۆنس" داوا لەسەرۆککۆماری وڵاتەکەی دەکات بەهیچ شێوەیەک ئەو بڕە گەنمەی کە تەنیا بەشی پێنج ڕۆژ لە خواردنی دانەوێڵەی ڕۆژانەی تونسییەکان دەکات ڕەتکاتەوە و وەرینەگرێت.

 

زانیاریی زیاتر: زۆربەی کاردانەوەکان لە تۆڕە کۆمەڵایەتییەکانی تونس  بەنیگەرانییەوە دەڕواننە ئەو بابەتە و دەڵێن، " عێراق پێشتر ئامرازی فیکری و زانستی ڕەوانەی تونس دەکرد، ئێستا گەنمی بۆ دەنێرێت " .

 

ئەمەش بزانە: بەهای ئەو  بڕە گەنمەی عێراق ڕەوانەی تونسی دەکات، بە 15 ملیۆن دۆلار دەخەمڵێنرێت، لەکاتێکدا بودجەی ساڵی 2025ـی ئەو وڵاتە زیاتر لە 20 ملیار دۆلارە.