ئەمریکا بۆ ئاڤا: یەکشەممە لەگەڵ ئێران کۆدەبینەوە

ئاڤا نیوز

دانوستانەکانی ئەمریکا و ئێران جارێکی دیکە دەستپێدەکاتەوە و بەرپرسێکی ئەمریکاش دەڵێت، کۆبوونەوەکە لە عومان دەبێت.

وێنە گەورەکە: هەوڵەکان بە نێوەندگیری عومان بۆ لێکنزیککردنەوەی ئەمریکا و ئێران بۆ ڕێککەوتن لەسەر بەرنامە ئەتۆمییەکەی تاران بەردەوامە و تا ئێستا سێ جار کۆبوونەتەوە.

لێدوانی فەرمی: سەرچاوەیەکی ئاگادار لە شاندی ئەمریکا بۆ ئاڤا میدیا ڕایگەیاند: ستیڤ ویتکۆف، ڕاوێژکاری باڵا و نێردەی تایبەتی سەرۆک ترەمپ بۆ ڕۆژهەڵاتی ناوەڕاست لەگەڵ شاندی یاوەری گەشت دەکات بۆ مەسقەتی پایتەختی عومان و ڕۆژی یەکشەممە چوارەمین گەڕی دانوستانەکانی ئەمریکا لەگەڵ ئێران لەو وڵاتە دەکرێت.

زانیاری زیاتر: هاوشێوەی گەڕەکانی پێشوو ئەمجارەشیان گفتوگۆکان بەشێوەی ڕاستەوخۆ و ناڕاستەوخۆ لە نێوان ئەمریکا و ئێران دەکرێت.

ئەمەش بزانە: ترەمپ چەند جارێک ئەوەی دووپات کردووەتەوە کە دەیەوێت بە بێ پەنابردنە بەر هێرشی سەربازی و لە ڕێگەی دانوستانەوە پرسی بەرنامەی ئەتۆمیی ئێران چارەسەر بکات. ئەمە لە کاتێکدایە بنیامین نەتانیاهۆ، سەرۆکوەزیرانی ئیسرائیل، دەیەوێت بە ڕێگەی سەربازی پرسەکە چارەسەر بکات.