پۆلیسی ڕاپەڕین: ئەو کەسەی هۆکاری خنکانی منداڵەکەی حاجیاوا بوو دەستگیرکرا

ئاڤا نیوز

پۆلیسی ڕاپەڕین لەسەر خنکانی مێرمنداڵێکی تەمەن 12 ساڵە لە حاجیاوا، شۆفێری شۆفڵێکیان دەستگیرکردووە، دەرکەوتووە ئەو هۆکار بووە بۆ خنکانی منداڵەکە.

چیرۆکی سەرەکی: کاتژمێر 4:30 ئێوارەی ئەمڕۆ، لە گوندی ئەستریلان سەر بە قەزای حاجیاوا، لە کاتی مەلەکردن لە گۆماوێکی پاشماوەی کارگەی چەو و لم مێرمنداڵێک دەخنکێت. پۆلیس لەسەر ئەم ڕووداوە لێکۆڵینەوە دەکات. لە کامێرای چاودێریەوە دەردەکەوێت شۆفێری شۆفڵێک منداڵەکان دەترسێنێت و ئەو بووەتە هۆکاری خنکانی منداڵەکە، ئەمەش بەپێی ڕاگەیێنراوی پۆلیسی ڕاپەڕین.

لێدوانی فەرمی: شۆڕش ئیسماعیل  وتەبێژی پۆلیسی راپەڕین بە ئاڤا نیوزی ڕاگەیاند: دوای ڕووداوەکە لێکۆڵینەوە دەستیپێکرد، دەردەکەوێت شۆفێرێکی کارگەکە بە دەمی شۆفڵ ئاو بە ئاراستەی دوو منداڵەکە دەبات کە سەرقاڵی مەلەکردنن و  هەوڵی ترساندنیان دەدات، بەو هۆیەوە یەکێک لە منداڵەکان بەهۆی شەپۆلی ئاوەکە نوقم دەبێت و دەخنکێت.

زانیاریی زیاتر: بەگوێرەی ڕاگەیێنراوی پۆلیسی ڕاپەڕین، ئەو کەسەی دەستگیرکراوە، دانیناوە بە تاوانەکە و وتویەتی، بۆیە ئەو کارەی کردووە، تاوەکو منداڵەکان بترسێن و چیتر بۆ مەلەکردن نەیەنەوە ئەو شوێنە.