بەرپرسێکی ئەمریکی: ترەمپ دەیەوێت لەگەڵ ئێران بگاتە ڕێککەوتن

ئاڤا نیوز

 

بەرپرسێکی ئەمریکی ئاشکرای دەکات، ئیدارەی دۆناڵد ترەمپ نیازی گەیشتن بە ڕێککەوتنی لەگەڵ ئێران هەیە، سەڕەڕای هەبوونی گرژیی لە نێوان هەردوولا.

 

وێنە گەورەکە: ئەمڕۆ یەکشەممە، گەڕی چوارەمی دانوستاندنەکانی نێوان واشنتن و تاران لە عومان بەڕێوەدەچێت، عەباس عێراقچی، وەزیری دەرەوە سەرۆکایەتیی شاندی ئێران و ستیڤ ویتکۆف، نێردەی دۆناڵد ترەمپ سەرۆکایەتیی شاندی ئەمریکا دەکەن.

 

زانیاریی بەدەستهاتوو: کەناڵی سی ئێن ئێن لەزاری بەرپرسێکی ئەمریکییەوە ئاشكرای دەکات، دۆناڵد ترەمپ، سەرۆکی ئەمریکا هەوڵ دەدات ئاشتی بۆ ڕۆژهەڵاتی ناوەڕاست دابین  بکات و پەیوەندییەکی نوێ لەگەڵ ئێران ببەستێت، ئارەزووی تەواوی هەیە کە لەگەڵ ئێران بگاتە ڕێککەوتن، گەرەنتی ئەوەش دەدات کە ئێران نابێت ببێتە خاوەن چەکی ئەتۆمی.

 

بۆچوونی لایەنی بەرامبەر: ئێران هەڵوێستی خۆی دووپات دەکاتەوە "کە دانوستاندن لەسەر بەرژەوەندییەکانی ناکات" و جەخت دەکاتەوە کە بەرنامەی ئەتۆمی تەنیا بۆ "مەبەستی ئاشتیانە بەکاردەهێنت".

 

بۆچی گرنگە: ئەم گەڕەی دانوستاندن چارەنووسسازە، چونکە نێردەی ئەمریکا هۆشداری دا لەوەی ئەگەر دانوستاندن ئەمجارە بەرهەمدار نەبێت، "ئەوا ئەمریکا بەردەوام نابێت و ڕێگایەکی جیاواز دەگرێتە بەر."