ناوی پێنج شوێن بۆ ڕادەستکردنی چەکەکانی پەکەکە ئاشكرا دەکرێت

ئاڤا نیوز

دەزگای میدیایی 'CNN TURK' ناوی پێنج شوێن ئاشكرا دەکات کە گەریلاکانی پەکەکە چەکەکانی لێ ڕادەست دەکەن، هەر پێنج شوێنەکەش دەکەونە هەرێمی کوردستان.

وێنە گەورەكە: لە چوارچێوەی پرۆسەی ئاشتی و لەسەر داوای عەبدوڵڵا ئۆجەلان، پارتی کرێکارانی کوردستان 'پەکەکە' 12ـەمین کۆنگرەی خۆی لە  ڕۆژانی 5 تا 7ـی ئەم مانگە بەست، ئەمڕۆش ئەنجامی کۆنگرەی ئاشکرا کرد و وەک چاوەڕوان دەکرا کۆتایی بە خەباتی چەکداری هێنا، بڕیاری چەکدانان و خۆ‌هەڵوەشاندنەوەی ڕاگەیاند، بەرپرسیاریێتی قۆناغی داهاتووشی خستە ئەستۆی تورکیا لە زامنکردنی مافەکانی گەلی کورد لە باکووری کوردستان.

ئەوەی لەبارەیەوە دەگوترێت: تۆڕی 'CNN TURK' بە پشتبەستن بە بڵاوکراوەی میدیاکانی نزیک لە پەکەکە، ڕایگەیاندووە، وەکو هەنگاوی یەکەم پێنج شوێن دیاریکراون بۆ ئەوەی گەریلاکانی پەکەکە چەکەکانیان ڕادەست بکەن، شوێنەکانیش دەکەونە سێ پارێزگای باشووری کوردستان؛ قەزای ئامێدی و ناحیەی كانی ماسێ لە دهۆک، قەزای کۆیە لە هەولێر، قەزاکانی ڕانیە و سەید سادق لە سلێمانی.

زانیاریی زیاتر: 'CNN TURK' ئاماژەی بە کاتی ڕادەستکردنی چەکەکان نەکردووە، بەڵام پێشتر ڕاگەیێنرابوو پرۆسەکە بە هاوبەشی دەزگا ئەمنی و هەواڵگرییەکانی تورکیا، عێراق و سووریا دەکرێت، بەهۆی ئەوەی هەر پێنج شوێنەکەش دەکەونە کوردستان، بەدڵنیاییەوە هێزە ئەمنییەکانی هەرێمی کوردستانیش ڕۆڵێکی بەرچاویان دەبێت.