چارەنووسی بزووتنەوەی گۆڕان بۆ بەشداریکردن لە هەڵبژاردنی عێراق نادیارە

ئاڤا نیوز

 

نەبەستنی کۆنفرانسی حیزب، بووەتە گرفت لەبەردەم بەشداریکردنی بزووتنەوەی گۆڕان لە هەڵبژاردنی خولی شەشەمی پەرلەمانی عێراق، کۆمسیۆنی هەڵبژاردنەکانی عێراقیش دەڵێت، "هەر حیزبێک کۆنگرەی نەبەستبێت، ناتوانێت بەشداری هەڵبژاردن بکات."

چیرۆکی سەرەکی: دوای ناکۆکییە ناوخۆییەکانی بزووتنەوەی گۆڕان، بزووتنەوەکە بەسەر دوو ئاراستەدا دابەشبووە، ئاڕاستەی گردی زەرگەتە ڕۆژی 05-04-2025 کۆنفرانسی گشتیی بەڕێوەبرد و کۆمسیۆن بەشداری نەکرد، 21 ڕۆژ دواتر ئاڕاستەی باڵی کوردسات کۆنفرانسیان بەڕێوەبرد و کۆمیسیۆنیش ئامادە بوو، بەڵام ڕێژەی پێویستی ئەندام ئامادە نەبوون.

وێنە گەورەکە: کۆمسیۆنی هەڵبژاردنەکانی عێراق، 24ـی ئەم مانگەی وەک وادەی بەستنی کۆنفرانسی گۆڕان داناوە کە دەکاتە چوار ڕۆژ دوای کۆتایی هاتنی وادەی پارت و هاوپەیمانێتییەکان، بەمەش گۆڕان لەبەشداریکردن لە هەڵبژاردن بێبەش دەبێت."

لێدوانی فەرمی: د.عیماد جەمیل، سەرۆکی تیمی ڕاگەیاندنی کۆمسیۆنی هەڵبژاردنی عێراق بە ئاڤای گوت، "هەر حیزبێک کۆنفرانسی نەبەستبێت لە دەسەڵاتی فەرمانگەی حیزب و ڕێکخراوە سیاسییەکان نییە تۆماری بکات، تاوەکو کۆنفرانس نەکەن، ئەمەش پێش کۆتایی هاتنی وادەکە دەکرێت."

بۆچووونی لایەنی بەرامبەر: ئاڤا قسەی لەگەڵ باڵی کوردساتی بزووتنەوەی گۆڕان کرد، ڕایانگەیاند، "بەهۆی کێشە ناوخۆییەکانمان بەرچاومان ڕوون نییە لەوەی بە چ میکانیزمێک کۆنفرانس ببەستین، چاوەڕێین وادەکە درێژ بکرێتەوە بۆ ئەوەی بتوانین خۆمان تۆماربکەین."