ئێران لەبارەی بەرنامەی ئەتۆمی لەگەڵ وڵاتانی ئەوروپا کۆدەبێتەوە

ئاڤا نیوز

سبەی هەینی ئێران لەگەڵ سێ زلهێزەکەی ئەوروپا لەبارەی کاراکردنەوەی ڕێککەوتنی 2015 تایبەت بە بەرنامەی ئەتۆمی کۆدەبنەوە.

زانیاریی بەدەستهاتوو: ئاژانسی ڕۆیتەرز لە سەرچاوەیەکی ئاگادار بڵاویکردووەتەوە، ڕۆژی هەینی، شاندی ئێران لەگەڵ بەریتانیا، فەرەنسا و ئەڵمانیا لە ئیستەنبووڵ تایبەت بە کاراکردنەوەی ڕێککەوتنی 2015 بەرنامەی ئەتۆمی کۆدەبنەوە.

لەلایەکی دیکەوە: بەگوێرەی زانیارییەکانی ڕۆیتەرز، ئەگەر تاران تاوەکو مانگی ئابی ئەمساڵ لەبارەی بەرنامەی ئەتۆمی لەگەڵ ئەمریکا و ئەوروپا نەگەنە هیچ ڕێککەوتنێک، ئەوە ئەوروپا سزاکانی 10 ساڵ لەمەوبەر بەسەر ئێران دەسەپێنێتەوە، وەزیری دەرەوەی ئێران هۆشداری داوەتە بەریتانیا، ئەڵمانیا و فەرەنسا، کە سەپاندنەوەی سزاکان بەسەر تاران، دەبێتە هۆی دروستبوونی بارودۆخێک  کە نەتوانرێت کۆنترۆڵ بکرێت.

باکگراوند: لە ساڵی 2015 هەر یەکە لە وڵاتانی ئەمریکا، چین، ڕووسیا، فەرەنسا، بەریتانیا و ئەڵمانیا لەگەڵ ئێران لەسەر سنووردارکردنی بەرنامەی ئەتۆمی تاران ڕێککەوتبوون، کە بە ڕێککەوتنی 5+1 ناسرابوو، بەڵام لە ساڵی 2018ـدا، دۆناڵد ترەمپ، لە خولی یەکەمی سەرۆکایەتیی ئەمریکادا بە بیانووی پێشێلکردنی ڕێکەوتننامەکە لەلایەن ئێرانەوە، لە ڕێککەوتنەکە کشایەوە.