ترەمپ لە ئیمارات کۆتایی بە گەشتەکەی بۆ ڕۆژهەڵاتی ناوەڕاست دەهێنێت

ئاڤا نیوز

لەدرێژەی گەشتەکەی دۆناڵد ترەمپ، سەرۆکی ئەمریکا، ئەمڕۆ پێنجشەممە بە سەردانێکی فەرمی دەچێتە ئیمارات و کۆتایی بە گەشتە سێ ڕۆژەکەی بۆ ڕۆژهەڵاتی ناوەڕاست دێت

چیڕۆکی سەرەکی: لە چوارچێوەی سەردانە سێ ڕۆژییەکەی دۆناڵد ترەمپ بۆ ڕۆژهەڵاتی ناوەڕاست، دوای سەردانی بۆ هەردوو وڵاتی سعوودیە و قەتەر، بڕیارە ئەمڕۆ بچێتە ئیمارات و کۆتایی بە گەشتەکەی بهێنێت.

چی ڕوودەدات: ئەمڕۆ، ترەمپ لە بنکەی ئاسمانی ئەلعودەید بەسەر دەکاتەوە، کە لە بیابانی باشووری ڕۆژئاوای دەوحەدایە و گەورەترین دامەزراوەی سەربازیی ئەمریکایە  لە ڕۆژهەڵاتی ناوەڕاستدا، وتارێک پێشکەش دەکات، پاشان بەرەو  ئەبوزەبی دەچێت و لەگەڵ محەمەد بن زاید ئال نەهیان سەرۆکی ئیمارات و سەرکردەکانی دیکە کۆدەبێتەوە.

زانیاریی بەدەستهاتوو: سەرکردەکانی ئیمارات هیوادارن وڵاتەکەیان بە هاوکاری ئەمریکا  ببێتە پێشەنگی جیهانی لە بواری زیرەکی دەستکرددا.

زانیاریی زیاتر: پێشبینی دەکرێت ترەمپ سەردانی مزگەوتی گەورەی شێخ زاید لە ئەبوزەبی بکات.