فوئاد حوسێن لە کۆبوونەوەی وەزیرانی دەرەوەی عەرەب: کاتی پێکەوە کارکردنە

ئاڤا نیوز

وەزیری دەرەوەی عێراق سەرۆکایەتی کۆبوونەوەی وەزیرانی دەرەوەی وڵاتانی عەرەبی وەرگرت و ڕایگەیاند، بەغدا پێشنیازی پێکهێنانی لیژنەیەک دەکات بۆ لێکنزیکردنەوە و چارەسەری کێشەی نێوان وڵاتان، جەختیشیکردەوە کە سیاسەتی دەرەوەی عێراق بریتییە لە بەهێزکردنی هەماهەنگیی و پێکەوەکارکردن.

چیرۆکی سەرەکی: نیوەڕۆی ئەمڕۆ کۆبوونەوەی وەزیرانی دەرەوەی وڵاتانی عەرەبی لە بەغدا دستیپێکرد، تێیدا ئەو پڕۆژەبڕیارانە پەسەند دەکەن کە لە 17ـی ئەم مانگەدا دەخرێنە بەردەم لووتکەی عەرەبی.

لێدوانی فەرمی: فوئاد حوسێن، وەزیری دەرەوەی عێراق و سەرۆکی ئەنجوومەنی وەزاری عەرەبی لە سەرەتای کۆبوونەوەکەدا وتارێکی پێشکەش کرد و ئاماژەی بەوەکرد، کۆبوونەوەکە لە کاتێکی هەستیاردا بەڕێوەدەچێت، ئەوەش پێویستی بە کاری پێکەوەیی هەموو وڵاتانی عەرەبی هەیە بۆ بەدیهێنانی خواستی گەلان لە خۆشگوزەرانی و ئاسایش و ئاوەدانی.

زانیاریی زیاتر: وەزیری دەرەوەی عێراق پێشنیازی کرد لیژنەیەکی وەزاری لەسەر ئاستی وڵاتانی عەرەبی پێکبهێنرێت، کاری لیژنەکەش لێکنزیککردنەوەی بۆچوونی وڵاتان و کەمکردنەوەی ناکۆکییەکان بێت، ئەوەشی خستەڕوو، عێراق پشتیوانی لە گفتوگۆی بونیادنەر و چارەسەری کێشەکان لەڕێگەی گفتوگۆوە دەکات، بۆ بەدیهێنانی ئاشتیش لە ناوچەکەدا هەموو هەوڵێکی خۆی دەخاتەکار.