فایلی خەڵک: دانیشتوانی گوندێکی سنووری پێنجوێن داوای قوتابخانەیەکی نوێ دەکەن

ئاڤا نیوز

 

ماوەی چەندین ساڵە دانیشتووانی گوندێکی سنووری قەزای پێنجوێن مزگەوتێکی کۆنیان کردووە بە قوتابخانە و ئێستاش بەهۆی زیاتر کۆنبوونییەوە مەترسی ڕووخانی لەسەرە. 

 

چیرۆکی سەرەکی: گوندی بۆریدەرە لەسەر سنووری نێوان باشوور و ڕۆژهەڵاتی کوردستان، دەکەوێتە بناری شاخی سوورێن و نزیکە پەنجا قوتابی هەیە، ماوەیەکی زۆرە مزگەوتێکی کۆنی گوندەکەیان لەسەر حسابی خۆیان نۆژەنکردووەتەوە و ئێستاش بەهۆی زیاتر کۆنبوونییەوە کەڵکی نەماوە. 

 

لێدوانی فەرمی: عوسمان حامید، بەڕێوەبەری قوتابخانەکەیە و بە پەیامنێری ئاڤای ڕاگەیاند، ئێستا قوتابخانەکەمان تەواو کۆنبووە و کەڵکی وانە وتنەوەی تێدا نەماوە، هاوکات هیچ مەرجێکی سەلامەتی تێدا نییە. 

 

بۆچوونی لایەنی بەرامبەر: نەژاد عەبدوڵڵا، بەڕێوەبەری گشتیی پەروەردەی سلێمانی لەو بارەیەوە بە ئاڤای ڕاگەیاند، خۆشحاڵین بۆ خەمخۆری و بەدواداچوونی ئاڤا میدیا لەسەر ئەم بابەتە پەروەردەییە گرنگە، پێشتر بڕیاری دروستکردنی قوتابخانە بۆ ئەم گوندە دەرچوو بوو، بەڵام بەهۆی سەختی ڕێگاکە دروست نەکراوە، لە هەوڵداین باڵەخانەیەکی مۆدێرنیان بۆ دروست بکرێت.