مەسرور بارزانی بۆ مارکۆ ڕوبیۆ: سوپاسی پشتیووانی درێژخایەنتان بۆ هەرێمی کوردستان دەکەم

ئاڤا نیوز

 

دوای کۆبوونەوەی لەگەڵ مارکۆ ڕوبیۆ، سەرۆکوەزیران مەسرور بارزانی لە پەیامێکدا  سوپاسی پشتیوانییەکانی ئەمریکا و وەزیری دەرەوەی ئەو وڵاتە دەکات.

 

وێنە گەورەکە: ماوەی نزیکەی هەفتەیەکە سەرۆکوەزیرانی کوردستان لە ئەمریکایە، زیاتر لە 20 کۆبوونەوەی لەگەڵ وەزیر و کۆنگرێسمانانی ئەمریکا کردووە، ئەمە جگە لە دوو گرێبەستی گەورەی 110 ملیار دۆلاری لە بواری وزە. ئێوارەی ئەمڕۆش لەگەڵ مارکۆ ڕۆبیۆ، وەزیری دەرەوەی ئەمریکا کۆبووەوە.

 

بڵاوکراوەی فەرمی: سەرۆکوەزیران مەسرور بارزانی لە هەژماری خۆی لە پلاتفۆرمی ئێکس، پەیامێکی سوپاسگوزاری ئاراستەی مارکۆ ڕوبیۆ، وەزیری دەرەوەی ئەمریکا دەکات و نوسیوویەتی، "زۆر سوپاس بەڕێز مارکۆ ڕوبیۆ بۆ میواندارییە گەرمەکەی ئەمڕۆتان و پشتیووانی درێژخایەن و هاوبەشییتان لەگەڵ هەرێمی کوردستان، چاوەڕێی بەردەوامبوونی گفتوگۆکانمان دەکەم."

 

باکگراوند: ڕۆژی دووشەممە، ڕێککەوتی 2025-05-19، بە سەرپەرشتی سەرۆکوەزیران مەسرور بارزانی، وەزارەتی سامانە سروشتییەکانی کوردستان و کۆمپانیاکانی 'ئێچ کەی ئینێرجی' و 'وێسترن زاگرۆس'ـی ئەمریکی، دوو گرێبەستیان لە بواری نەوت و وزە واژۆ کرد.