بە هەوڵی حكومەتی هەرێمی كوردستان پارچە زەوی بە هەزاران خێزانی خانەقین دەدرێت

ئاڤا نیوز

لەسەر داواكاری و هەوڵی حكومەتی هەرێمی كوردستان، حكومەتی عێراق پارچە زەوی بە هەزاران خێزانی ئاوارەی شاری خانەقین دەدات.

 

ڕاگەیێنراوی فەرمی: نوێنەرایەتیی حكومەتی هەرێمی كوردستان لە بەغدا ڕایگەیاند: لە ئەنجامى هەوڵ و کۆشش و داواکارییە بەردەوامەکانى د. دژوار فایق، ڕاوێژکاری سەرۆکوەزیران مەسرور بارزانی و نوێنەرى حکومەت لە لیژنەى جێبەجێکردنى ماددەى 140، سەر بە ئەمیندارییەتى گشتیى ئەنجوومەنى وەزیرانى فیدراڵ، بڕیاردرا پارچە زەوى بەسەر ئاوارە گەڕاوەکان بۆ شارى خانەقین دابەش بکرێت. 

زانیاریی زیاتر: دوای ڕووخانی ڕژێمی بەعس، دەیان هەزار خێزانی كوردی كۆچپێكراوی شاری خانەقین، گەڕاونەتەوە زێدی خۆیان، بەڵام تاوەكو ئێستا حكومەتی عێراق هیچ پارچە زەوییەكی وەك قەرەبوو پێ نەداون.

 

ئەوەی پێویستە بیزانیت: بەپێی ڕاگەیێندراوەكەی نوێنەرایەتیی حكومەتی هەرێمی كوردستان لە بەغدا، ئەو خێزانانەى کە گەڕاونەتەوە بۆ شارى خانەقین، بڕیارى قەرەبووى ماددى و تەرخانکردنى پارچە زەویى نیشتەجێبوون دەیانگرێتەوە.