کۆڵبەرێکی کورد بە تەقەی ڕاستەوخۆی هێزە ئەمنییەکانی ئێران دەکوژرێت

ئاڤا نیوز

کۆڵبەرێکی کورد کە خەڵکی پاوەی ڕۆژهەڵاتی کوردستانە لەلایەن پاسەوانانی سنووری ئێران کوژرا.

وێنە گەورەکە: بەیانی ئەمڕۆ 25-5-2025، کۆڵبەرێکی کوردی خەڵکی شاری پاوەی ڕۆژهەڵاتی کوردستان، بە تەقەی ڕاستەوخۆی هێزە چەکدارەکانی ئێران لە سنووری نەوسوود کوژرا.

ڕاگەیێنراوی فەرمی: ماڵپەڕی کۆڵبەرنیوز ڕایگەیاندووە، ئەو کۆڵبەرە ناوی "محەمەد ڕەحیمی"ـیە و خەڵکی بانەوڕێی سەر بە شاری پاوە بووە، ئەو کۆڵبەرە خێزاندارە و باوکی منداڵێک بووە، تەرمەکەی بۆ پزیشكی داد لە پاوە گواستراوەتەوە و تائێستا ڕادەستی خانەوادەکەی نەكراوەتەوە.

ئەوەی پێویستە بیزانیت: بەگوێرەی ڕاپۆرتی کۆڵبەرنیوز، لە ماوەی 12 مانگی ڕابردوودا 52 کۆڵبەر کوژراون و 131 کۆڵبەری دیکەش برینداربوون کە لە 78%ـی بەهۆی تەقەی ڕاستەوخۆ بووە لەلایەن هێزەکانی ئێرانەوە.

لە کۆی ئەو 52 کۆلبەرەی کە لە ماوەی 12 مانگی ڕابردوو کوژراون 11 کەسیان تەمەنیان لە خوار 18 ساڵییەوە بووە.