نەبوونی کارەبا دانیشتووانی چەند پارێزگایەک لە عێراق دەهێنێتە سەر شەقام

ئاڤا نیوز

بەهۆی نەبوونی کارەبا و بەرزبوونەوەی پلەکانی گەرما، دانیشتووانی چەند ناوچەیەک لە پارێزگاکانی نەجەف و دیوانییە دەستیان بە خۆپیشاندان کرد و هاوکات شەقامە سەرەکییەکانیان داخست.

وێنە گەورەكە: قەیرانی نەبوونی كارەبا یەكێكە لە كێشە گەورەكان كە لە دوای پڕۆسەی ئازادكردنی عێراقەوە بەرۆكی عێراقییەكانی گرتووە و تائێستاش چارەسەر نەكراوە.

ئەوەی ئێستا ڕوودەدات: بێ کارەبایی و بەرزبوونەوەی پلەکانی گەرما، وای لە دانیشتوانی قەزای مونازەر و ناحیەی حەیدەرییە پارێزگای نەجەف و هاوکات شاری غەمماس لە پارێزگای دیوانییە کرد، دەست بە خۆپیشاندان بکەن و ڕێگا سەرەکییەکان دابخەن.

ئەوەی پێویستە بیزانیت: وەزارەتی کارەبای عێراق ئاشکرای دەکات، بەهۆی کەمبوونەوەی هەناردەی غازی ئێران بۆ عێراق، 17 هەزار مێگاوات کورتهێنانیان لە بەرهەمهێنانی کارەبا هەیە، هاوکات هاوینێکی سەخت چاوەڕێی هاووڵاتییان دەکات.