بە تۆمەتی دزینی پارەی کارمەندانی سەرژمێری بەرپرسێکی پلاندانانی عێراق زیندانی دەکرێت

ئاڤا نیوز

بەڕێوەبەری بەشی ئامار لە پارێزگای سەڵاحەددین بە تۆمەتی دزینی پارەی بژمێرەکانی سەرژمێریی گشتیی دانیشتووان، سزای حەوت ساڵ زیندانی بۆ دەرکرا.

وێنە گەورەکە: گەندەڵی بووەتە دیاردەیەکی مەترسیدار لە عێراق و باڵی بەسەر هەموو بوارەکانی ژیاندا کێشاوە و زۆرجاریش بووەتە کۆسپ لەبەردەم بووژانەوەی ئابووری و گەشەکردن.

ڕاگەیێنراوی فەرمی: بەگوێرەی ڕاگەیێنراوی ئەنجوومەنی باڵای دادوەری، دادگای تاوانەکانی سەڵاحەددین سزای حەوت ساڵ زیندانی بۆ بەڕێوەبەری بەشی ئامار لە پارێزگاکە دەرکرد بە تۆمەتی دزینی پارەی تەرخانکراوی ئەو بژمێرانەی وەک فەرمانبەرانی گرێبەست لە سەرژمێری گشتی دانیشتووان کاریان کردووە.

ئەوەی پێویستە بیزانیت: هەر بژمێرێک بۆ هەر مانگێك كاركردن بڕی 250 هەزار دیناری پێدەدەرێت، بە گشتی بژمێرەكان دوو مانگ كاریان كردووە و بەڕێوەبەرەكانیش سێ تاوەكو پێنج مانگ كاریان كردووە.

باکگراوند: لە ڕۆژانی 20 و 21ـی تشرینی دووەمی 2024، سەرژمێریی گشتی لە هەموو پارێزگاکانی عێراق و هەرێمی کوردستان بەڕێوەچوو. تێیدا 120 هەزار بژمێر پرۆسەکەیان بەڕێوەبرد.