ئێران داواکارییەکی فەرمی ئەمریکا ڕەت دەکاتەوە

ئاڤا نیوز

وتەبێژی وەزارەتی دەرەوەی ئێران هەڵوێستی فەرمی و کۆتایی وڵاتەکەی بۆ دەستبەرداربوون لە پیتاندنی یۆرانیۆم دەخاتەڕوو.

وێنە گەورەکە: سەرەڕای بەردەوامی کۆبوونەوە و دانووستانەکانی تاران و واشنتن لەسەر بەرنامە ئەتۆمییەکەی ئێران، بەڵام تاوەکو ئێستا هەردوولا لەسەر چەندین پرس ناکۆکن، ئەمریکا چەندین جار دووپاتیکردووەتەوە نابێت ئێران بە هیچ شێوەیەک ببێتە خاوەنی چەکی ئەتۆمی.

لێدوانی فەرمی: ئیسماعیل بەقائی، وتەبێژی وەزارەتی دەرەوەی ئێران ئەمڕۆ دووشەممە لە کۆنگرەیەکی ڕۆژنامەوانییدا ڕایگەیاند: ئەمریکا لە ڕێگەی نامەیەکی فەرمیەوە داوای کردووە ئێران بە یەکجاری دەستبەرداری پیتاندنی یۆرانیۆم ببێت، وەرگرتنی نامەکە لە ڕێگەی سەڵتەنەی عومانەوە کە کۆمەڵێک پێشنیازی تێدا هاتووە واتای پەسەندکردنی نییە لە لایەن ئێرانەوە، بەڵکو دەستبەرداربوونی تاران لە پیتاندنی یۆرانیۆم بە هەموو شێوەیەک ڕەت دەکەینەوە، لە کۆبوونەوەی داهاتوودا داوا لە ئەمریکا دەکەین هەموو سزاکانی سەر ئێران هەڵبگرن.

لەلایەکی دیکەوە: بە پێی ڕاپۆرتە ڕۆژنامەوانییەکان کە لە سەرچاوە دیپلۆماسیەکانی ئەمریکاوە گواستیویانەتەوە، ئەمریکا مەرجی هەیە بۆ هەڵگرتنی سزاکان، دەبێت ئێران بە تەواوی دەستبەرداری بەرنامە ئەتۆمیەکەی بێت ئەوکات واشنتن سزاکانی سەر ئێران هەڵدەگرێت.