ئەردۆغان: هاوینی ئەمساڵ ئاسایشی سنووری عێراق گەرەنتی دەکەین

ئاڤا نیوز

ئەردۆغان لەبارەی هێرشکردنە سەر پەکەکە لە باشووری کوردستان و عێراق ڕایدەگەیێنێ، هاوینی ئەمساڵ ئاسایشی سنوور بەتەواوی گەرەنتی دەکەن.

وێنە گەورەکە: تورکیا پلانی ئۆپەرسیۆنێکی گەورەی بۆ هاوینی ئەمساڵ لە خاکی هەرێمی کوردستان و عێراق بۆ سەر پەکەکە داڕشتووە، بۆ ئەمەش هەنگاوەکانی چڕتر کردووونەتەوە.

چیرۆکی سەرەکی: ڕەجەب تەیب ئەردۆغان، سەرۆککۆماری تورکیا، دوێنێ ئێوارە لە فەرماندەیی فەیلەقی 4 لەگەڵ سەربازەکان بەربانگی کردەوە، پاشان گوتارێکی دا و جارێکی دیکە هێرشی تووندی کردەوە سەر پەکەکە.

 

لێدوانی فەرمی: ئەردغان باسی لەوە کرد ماوەیەکی زۆرە ئارامیان گرتووە "لەسەر مەترسییەکانی تیرۆر" بۆ سەر ئاسایشی تورکیا، بەڵام هاوینی ئەمساڵ  "بێ گوێدانە ئەوەی کێ پاڵپشتیانە کۆتاییان پێدەهێنین"، کە مەبەستی پەکەکە بوو.

 

لەلایەکی دیکەوە: لەبارەی سووریا و ڕۆژئاوای کوردستان ئەردۆغان گوتی، بەدڵنیاییەوە کارە تەواونەکراوەکانیان  تەواو دەکەن.

ئەوەی پێویستە بیزانیت: بڕیارە ئەردۆغان دوای جەژنی ڕەمەزان سەردانی عێراق بکات، هەفتەی ڕابردووش شاندێکی  بە سەرۆکایەتی هاکان فیدان، وەزیری دەرەوە بۆ دانوستان و ئامادەکارییەکان ناردە عێراق.