ئەنجوومەنی وەزیران بڕیارێک لە بەرژەوەندی کەسوکاری شەهیدان دەردەکات

ئاڤا نیوز 

 

ئەنجوومەنی وەزیرانی هەرێمی كوردستان، پێشنیاری لێخۆشبوونی كوڕ و كچی شەهید و زیندانیانی سیاسی لە پێشینەی هاوسەرگیری پەسەند كرد.

 

چیرۆکی سەرەکی: ئەمڕۆ چوارشەممە 4ی حوزەیرانی 2025، بە سەرپەرشتيی سەرۆکوەزیران مەسرور بارزانی و ئامادەبوونی قوباد تاڵەبانی، جێگری سەرۆکوەزیران، ئەنجوومەنی وەزیرانی هەرێمی کوردستان کۆ بووەوە و لەمیانەدا چەند پرسێک تاووتوێ كران و چەند بڕیارێكیش دران.

ڕاگەیێنراوی فەرمی: لە یەكێک لە بڕگەكانی كۆبوونەوەكەی ئەنجوومەنی وەزیران، نووسراوی وەزارەتی کاروباری شەهیدان و ئەنفالکراوان  سەبارەت بە پێشنیاری لێخۆشبوون بۆ کوڕ و کچی شەهیدان و زیندانیانی سیاسیی لە پێشینەی هاوسەرگیری خرایە ڕوو لەسەر بنەمای بڕیاری ئەنجوومەنی وەزیران ژمارە 158 لە 2025/3/12 بۆ ئەوانەی کە سوودمەند نەبوون لە مینحە و دیاریی هاوسەرگیریی،  ئەنجوومەنی وەزیران بەکۆی دەنگ ڕەزامەندی لەسەر پێشنیارەکە دا.

لەلایەكی دیكەوە: هەر لە كۆبوونەوەكەدا ئەنجوومەنی وەزیران بڕیاری دا بە بۆنەی جەژنی قوربان، لە ڕۆژی هەینی 2025/6/6 تا رۆژی دووشەممەی هەفتەی داهاتوو 2025/6/9 ڕۆژانی پشووی جەژن بێت و ڕۆژی سێشەممە 2025/6/10 دەوامی فەرمیی دەستپێدەکاتەوە.