بەڕێوەبەری حەج و عومرەی کوردستان وادەی گەڕانەوەی حاجیان لەڕێگەی ئاڤاوە ئاشکرا دەکات

ئاڤا نیوز

پرۆسەی حەجی ئەمساڵ کۆتایی هات، بەڕێوەبەری حەج و عومرەی کوردستانیش وادەی گەڕانەوەی حاجیانی سەرجەم پارێزگاکانی هەرێمی کوردستان لە ڕێگەی وشکانی و ئاسمانی ئاشکرا دەکات.

وێنە گەورەکە: نزیکەی مانگێکە پێنج هەزار و 136 حەجخواز لە هەرێمی کوردستانەوە ڕوویان لە وڵاتی سعوودیە کردووە، سەرجەم ئەرکەکانیان تەواوکردووە، بڕیارە سەرەتای هەفتەی داهاتوو پرۆسەی گەڕانەوەیان دەست پێبکات.

لێدوانی فەرمی: شێخ نیاز نەقشبەندی، بەڕێوەبەری حەج و عومرەی کوردستان بە ئاڤای گوت، "ڕۆژی 14-06-2025، لەڕێگەی وشکانی، حاجیانی هەولێر، سۆران، زاخۆ، دهۆک، حاجیانی سلێمانی، هەڵەبجە، ئیدارەی ڕاپەرین و گەرمیان بەرەبەیانی 15ـی مانگ دەگەنەوە هەولێر، ژمارەیان هەزار و 646 حاجییە."

بە گوتەی بەڕێوەبەری حەج و عومرەی کوردستان، سێ هەزار و 490 حاجی دیکە لەڕێگەی ئاسمانییەوە دەگەڕێنەوە، ڕۆژی 14-06-2025 فڕۆکەی حاجیانی سنووری هەولێر کاتژمێر 09:00 لە فڕۆکەخانەی هەولێر دەنیشێتەوە، سلێمانی لە هەمان ڕۆژ و کاتژمێر 11:00 دەگاتە فڕۆکەخانە سلێمانی.

ئەوەی پێویستە بیزانیت: ئەمڕۆ یەکشەممە 8-6-2025، ئافرەتێکی کورد بەناوی مەریەم عەبدولعەزیز یوسف لە تەمەنی 70 ساڵی کە خەڵکی ئیدارەی سەربەخۆی زاخۆیە لەدوای ئەرک و بەجێگەیاندنی فەریزەی حەج، لە وڵاتی سعوودیە گیانی لەدەستدا و تاوەکو ئێستا شجگەم لەم ئافرەتە هیچ حاجییەکی دیکەی هەرێمی کوردستان گیانی لەدەست نەداوە.