تازە هاوسەران چۆن لە سیستمی نوێی پسوولەی خۆراک تۆمار دەکرێن؟

ئاڤا نیوز

ئەو کەسانەی تازە هاوسەرگیرییان کردووە و پسوولەی خۆراکیان نییە، ناتوانن لە سیستمی نوێی پسوولەی خۆراک خۆیان تۆمار بکەن.

بابەتی سەرەکی: ئەو ژن و مێردانەی تازە گرێبەستی هاوسەرگیرییان کردووە و پسوولەی خۆراکیان نییە، زانیارییان لەبارەی چۆنیەتی پڕکردنەوەی سیستمە نوێیەکە نییە و داوایان لە ئاڤا کرد بەدواداچوونیان بۆ بکات، ئاخۆ دەتوانن لەم سیستمە نوێیەدا ببنە خاوەنی پسوولەی خۆیان یان نا.

لێدوانی فەرمی: سیامەند قادر، بەڕێوەبەری ڕێکخستنی پسوولەی خۆراک، بە ئاڤا میدیای ڕاگەیاند: ئەو هاوسەرە نوێیانەی کە پسوولەی خۆراکیان نییە، کوڕەکە و کچەکە بە جیا لەسەر پسولەی ماڵە باوانیان ناویان تۆمار دەکەن، چونکە هێشتا خزمەتگوزاری تۆمارکردنی هاوسەرگیریی نوێ ئەکتیڤ نەکراوە.

- ئێستا لە شاری واست لە باشووری عێراق، ناوی منداڵی تازە لەدایکبوو لە پسوولەی خۆراک ئەکتیڤ کراوە.

- ڕەنگە لە چەند مانگی داهاتوودا خزمەگوزاری تۆمارکردنی ناوی هاوسەرانی نوێ کارا بکرێت، ئەو کاتە دەتوانن بە پێشکەشکردنی بەڵگەنامەی هاوسەرگیرییان پسوولەی خۆراکی نوێ بۆ خۆیان دروست بکەن.

ئەوەی پێویستە بیزانیت: پارێزگاکانی هەولێر و سلێمانی و دهۆک پێکەوە دەست بە تۆمارکردنی پسوولەی خۆراکی نوێ کراوە، دوایین وادەش بۆ تۆمارکردن 5-7-2025 دانراوە، پێشبینی دەکرێت داوای درێژکردنەوەی وادەکەش بکرێت.