دوو ملیار دیناری دیكە بۆ چارەسەركردنی گرفتەكانی ئاو لە هەولێر تەرخان دەكرێت

ئاڤا نیوز

لە سەر ڕەزامەندیى سەرۆكوەزیران مەسرور بارزانی، بڕی دوو ملیار دیناری دیكە وەک فریاگوزاریى بۆ چارەسەرکردنى کەموکوڕى و گرفتەکانى ئاو لە شاری هەولێر تەرخان دەكرێت.

چیرۆکی سەرەکی: ئەمڕۆ پێنجشەممە 2025.6.12، بە سەرپەرشتی ئومێد خۆشناو، پارێزگاری هه‌ولێر، له‌ دیوانى پارێزگا، کۆبونەوەیەکی تایبەت بە کار و پڕۆژە و پلان و بەرنامەکانى چارەسەریى ئاو و  بەدواداچوون لە دەرەنجامى کارى پڕۆژەکانى فریاگوزاریى خێراى ئاوى هەولێر، بەستنەوەی پڕۆژەکە بە تۆڕە ناوخۆییەکانی ناوشار، پرۆژەی ئاوی قوشتەپە و دەوروبەری ئه‌نجام درا.

لێدوانی فەرمی: ئومێد خۆشناو، پارێزگاری هەولێر ڕایگەیاند: پلان و بەرنامەڕێژیی تۆكمە و چەندین پڕۆژەی گرنگ لە ساڵانى ڕابردوودا بە پاڵپشتی و لەسەر فەرمان و ڕاسپاردەی  سەرۆكوەزیران مەسرور بارزانی بۆ چارەسەرکردنى گرفتى کەمئاوى لە سنوورى پارێزگاى هەولێر ئەنجامدراون و توانراوە بە هۆیانەوە قۆناغى زۆر باش ببڕین و تاڕادەیەکى زۆر گرفت و کێشەکان چارەسەر بکرێت

قووڵتر: ئێستا لە 78%ـی کارەکانى پڕۆژەی فریاگوزاریی خێرای ئاوی هەولێر و لە 90%ـی کارەکانى بەستنەوەی پڕۆژەکە بە تۆڕە ناوخۆییەکانی ناوشارى هەولێر تەواو بووە و لە سەرەتا تاوەكوو ناوەڕاستى مانگی 7ـی ئەمساڵ بەشێک لەو گەڕەکانەی کەوتوونەتە نێوان شەقامی ڕەشکین و تاوەکو شەقامی کۆیە لە دەرەوەى شەقامى خێراى 120 مەترى، کە لە پێشتردا بەهۆی دابەزینی ئاستی ئاوی ژێر زەوی دووچاری کەمئاوی هاتبوون، بەهۆى ئەو پڕۆژە ستراتیژیەوە ئاو دەگاتە گەڕەکەکانیان و کێشەی ئاویان نامێنێت، سەبارەت بە پڕۆژەى ئاوى قوشتەپەش کە ئێستا 40%ـی کارەکانى کۆتایی هاتووە و بڕیارە لە مانگى 11ـی ئەمساڵ بەکۆتابێت.

زانیاریی زیاتر: لە كۆبوونەوەکەدا، پارێزگارى هەولێر، جگە لە دووپاتکردنەوەى دابینکردنى کارەباى 24 کاتژمێرى بۆ ئەو بیرانەى ئاوى پاکى ماڵان، کە کارەبای گەڕەکەکانیان نەبووەتە 24 کاتژمێرى، هەروەها بۆ ئەو گەڕەکانەى کێشە و گرفتى کەمئاویان بڕیاری دا لە ڕێگەى تەنکەر ئاویان بۆ دابین بکرێت، لە ئەگەرى کەمبوونەوەی سەرچاوەکانی ئاویش، سەرجەم لایەنە پەیوەندیدارەکان و فەرمانگە خزمەتگوزارییەکانی ڕاسپارد لە ئامادەباشی تەواودابن و لە خێراترین کاتدا چاره‌سه‌ری کێشە و گرفتەکان بکرێت.

لەلایەكی دیكەوە: پارێزگارى هەولێر سەبارەت بە نۆژەنکردنەوە و چاککردنەوەى کەموکوڕییە تەکنیکییەکان و چاره‌سه‌ركردنى گرفت و کێشەکان و پاککردنەوەى ڕێڕەوى سەرچاوەى ئاوى ئاودێرى و کانیاوى گوندەکان، پارێزگارى هەولێر، ڕایگەیاند بۆ ئەو مانگەش سەرۆكوەزیران مەسرور بارزانی بڕی دوو ملیاری دیکە تەرخانکراوە وەک فریاگوزاریى بۆ چارەسەرکردنى کەموکوڕى و گرفتەکان، کە لە مانگى ڕابردووش بڕى  دوو ملیار و 500 ملیۆن دینار تەرخان کرابوو بۆ هەمان مەبەست، ئەو بودجەیەش تاوەكوو بە کۆتاهاتنى پڕۆژەى فریاگوزارى خێراى ئاوى هەولێر بەردەوامى دەبێت.