ئێران پرسی گەڕی شەشەمی دانوستانەکانی لەگەڵ ئەمریکا بە هەڵواسراوی دەهێڵێتەوە

ئاڤا نیوز

لەبارەی بەڕێوەچوونی گەڕی داهاتووی دانوستانەکانی ئەمریکا و ئێران، وەزارەتی دەرەوەی ئێران ئاشکرای دەکات: جارێ ڕوون نییە چی دەکەین.

 

چیڕۆکی سەرەکی: دوای یەک مانگ لە هەڕەشەکانی ئیسرائیل بۆ سەر ئێران دواجار ئیسرائیل هێرشە بەرفروانەکەی بۆ سەر ئێران دەستپێکرد و ‌هێرشێکی فراوانی بۆ سەر خاکی ئێران لەلایەن ئیسرائیلەوە ئەنجامدرا، دەستبەجێی شەوی ڕابردوو ئێران وەڵامی هێرشەکانی دایەوە و تاوەکو ئێستا هێرشەکانی هەردوولا بۆ سەر یەکتری بەردەوامن.

 

چی ڕوودەدات: بڕیار وابوو سبەی یەکشەممە 15-6-2025، شەشەم گەڕی دانوستانە ناڕاستەوخۆکانی نێوان ئەمریکا و ئێران بە نێوەندگیری عومان بەڕێوەبچێت، بەڵام بەهۆی ئەم پێشهاتەی ئێستا دروستبووە چارەنووسی ئەو دانوستانە دیار نییە، ئەمریکاش لای خۆیەوە ئامادەیە سبەی لەگەڵ ئێران دابنیشێت.

 

بڵاوکراوەی فەرمی: ئاژانسی ئێرنا لەزاری ئیسماعیل بەقائی، وتەبێژی وەزارەتی دەرەوەی ئێران ڕایگەیاند، ''تاوەکو ئێستا ڕوون نییە ئێمە چ بڕیارێک سەبارەت بە ڕۆژی یەکشەممە دەدەین''.

 

کاریگەری و لێکەوتەکان: ئەم لێدوانەی بەقائی لە کاتێکدایە، هێرشەکانی ئیسرائیل و ئێران بەردەوامن، سەرۆکی ئەمریکاش ئاماژەی بەوەکردووە، ئەم هێرشەی ئیسرائیل چانسی ڕێککەوتن لەگەڵ ئێران زیاتر دەکات.