سەرجەم حاجیانی هەرێمی کوردستان گەڕانەوە

ئاڤا نیوز

دوای وەستانی گەشتە ئاسمانییەكان، بە بڕیاری سەرۆكوەزیران مەسرور بارزانی، سەرجەم حاجیانی هەرێمی كوردستان بە ڕێگەی وشكانی و لە چەند ڕۆژێكدا گەڕێندرانەوە هەرێمی كوردستان.

وێنە گەورەكە: بەهۆی دروستبوونی جەنگی نێوان ئیسرائیل و ئێران، گرفت بۆ گەڕانەوەی حاجیانی ئەمساڵی هەرێمی كوردستان دروست بوو و عێراق و هەرێمی كوردستان سەرجەم گەشتە ئاسمانییەكانیان ڕاگرت، لەسەر بڕیاری سەرۆكوەزیران مەسرور بارزانی، هەرێمی كوردستان ڕێوشوێنی پێویستی گرتە بەر و بە هاوكاریی لایەنە پەیوەندیدارەكان و بەرپرسانی وڵاتی سعوودیە تواندرا سەرجەم حاجیان لەڕێگەی وشكانییەوە بە زووترین كات بگەڕێندرێنەوە.

ڕاگەیێنراوی فەرمی: وەزارەتی ئەوقاف و كاروباری ئایینی حكومەتی هەرێمی كوردستان ڕایگەیاند: بە ھەوڵی تیمە کارگێڕییەکان، ئەمساڵ توانرا پڕۆسەیەکی نمونەیی حەج پێشکەش بکرێت و سەرجەم حاجیانی هەرێمی كوردستان بە سەلامەتی گەڕانەوە ناو كەسوكاریان.

زانیاریی زیاتر: لە ماوەی حەجی ئەمساڵ تەنیا یەک حاجیی هەرێمی كوردستان لە مەککە کۆچی دوایی کرد.

ئەوەی پێویستە بیزانیت: بەمەبەستی بەجێهێنانی فەریزەی حەجی ئەمساڵ، پێنج هەزار و 136 کەس لە هەرێمی کوردستانەوە ڕوویان لە وڵاتی سعوودییە کردووە کە هەزار و 646 کەسیان لەڕێگەی وشکانی و سێ هەزار و 490 کەسی دیکەش لەڕێگەی ئاسمانییەوە گەشتەکەیان کرد.