وەزارەتی ناوخۆ هۆشداریی دەدات: ئاگاداری نامە فێڵاوییەکانی iMessage بن

ئاڤا نیوز

بەڕێوەبەرایەتیی گشتیی ئاسایشی سایبەری لە وەزارەتی ناوخۆی عێراق، هۆشداری دەداتە هاووڵاتیان لەبارەی بڵاوبوونەوەی ژمارەیەک نامەی فێڵاوی لە ڕێگەی ئەپلیکەیشنی  iMessageـی تایبەت بە مۆبایلەکانی ئایفۆن و تۆڕە کۆمەڵایەتییەکانی دیکەوە، کە ئامانجیان دزینی زانیاریی کەسی و بانکییە.

 

ڕاگەیێنراوی فەرمی: بەگوێرەی ڕاگەیێنراوی بەڕێوەبەرایەتییەکە، ئەم نامانە زانیاریی ساختە و بەڵێنی دارایی وەهمی لەخۆدەگرن بۆ ئەوەی بەکارهێنەران هان بدەن کرتە لەسەر لینکی گوماناوی بکەن. کردنەوەی ئەو لینکانە دەبێتە هۆی دزینی زانیارییەکان لە ڕێگەی لاپەڕەی "فیشینگ" (ڕاوکردنی ئەلیکترۆنی) یان داگرتنی بەرنامەی زیانبەخش بۆ سەر مۆبایلەکان.

 

بۆ پاراستنی هاووڵاتیان، بەڕێوەبەرایەتییەکە ئەم ڕاسپاردانەی خوارەوەی بڵاوکردووەتەوە:

ڕاسپاردەکان:

1.    کارلێک مەکەن لەگەڵ ئەو بڵاوکراوانەی بەڵێنی سەرنجڕاکێش و بێبەڵگەیان تێدایە.
2.    خۆتان بەدوور بگرن لە کردنەوەی هەر لینکێکی سەرچاوە نادیار یان گوماناوی.
3.    پێش کرتەکردن لەسەر هەر لینکێک، دڵنیابنەوە لە ڕاستییەکەی لە ڕێگەی ماڵپەڕی وەک VirusTotal.
4.    زانیارییە کەسی و بانکییەکانتان لەگەڵ هیچ لایەنێکی ناباوەڕپێکراو یان نەناسراودا هاوبەش مەکەن.
5.    بەرنامەی دژە ڤایرۆس و بەرنامەی زیانبەخش (Anti-Malware) دابمەزرێنن و بەشێوەیەکی بەردەوام نوێی بکەنەوە.