عەرەبی هاوردە هەوڵی داگیركردنی سەدان دۆنم زەویی كوردانی دووزخورماتوو دەدات

ئاڤا نیوز

بەمەبەستی ڕێگەگرتن لە داگیركردنی زەوییەكانیان لەلایەن عەرەبی هاوردەوە، جووتیارانی كوردی دانیشتووی گوندی تەپەسەوزی دووزخورماتوو گردبوونەوە و دووپاتیان كردەوە كە ڕێگە بە هیچ كەس و لایەنێك نادەن زەوییەكانیان داگیر بكات.

چیرۆكی سەرەكی: نیوەڕۆی ئەمڕۆ یەكشەممە 22-6-2025، هێزێكی ئەمنیی عێراق بە پشتبەستن بە چەند بەڵگەنامە و بڕیارێكی دادگە ویستیان زەویی جووتیارانی كوردی گوندی تەپەسەوز ڕادەستی عەرەبی هاوردە بكەن بەڵام لەلایەن جووتیارانی كوردەوە ڕێگرییان لێ كرا.

زانیاریی پەیامنێر: دیار مەحموود، پەیامنێری ئاڤا میدیا ڕایگەیاند:  بە بڕیارێكی دادگە و بە پاڵپشتیی ژمارەیەك بەرپرسی ناوچەكە، عەرەبی هاوردە هەوڵی داگیركردنی 1500 دۆنم زەویی كوردانی گوندی تەپەسەوزی سەر بە قەزای دووزخورماتوو دەدات، نیوەڕۆی ئەمڕۆ جووتیارە كوردەكان چوونە سەر زەوییەكانیان خۆیان و گردبوونەوە و ڕایانگەیاند كە بە هیچ شێوەیەك بەمە ڕازی نابن.

زانیاریی زیاتر: جووتیارەكان بۆ پەیامنێری ئاڤا میدیا قسەیان كرد و دەڵێن هاتووین بەرگری لە زەوییەكانی خۆمان بكەین و ڕێگە بە هیچ كەسێك نادەین زەوییەكانی ئێمە داگیر بكات مەگەر بەسەر لاشەی ئێمەدا بڕۆن، جووتیارانەكان دەڵێن جگە لەو زەوییانە هیچی دیكەیان نییە و عەرەبەكان پۆلیسیان لەگەڵ خۆیان هێناوەتە نزیك زەوییەكان بەڵام ڕێگەیان پێنادەین، جووتیارە كوردەكان جەخت دەكەنەوە كە زەوییەكان هی باب و باپیرانیانە.

ئەوەی پێویستە بیزانیت: پێشووتر لەسەر دەستی ڕژێمی بەعسی عێراق  كوردانی ناوچەكە بۆ ناوچەی دوورەدەست ڕاگوێزراون و پاشان عەرەبی هاوردە چوونەتە سەر زەوییەكانیان و داگیریان كردوون.