پزیشکیان: ئەمریکا لەبەر لاوازی ئیسرائیل هێرشی کردە سەر ئێمە

ئاڤا نیوز

 

سەرۆککۆماری ئێران لە یەکەم لێدوانی دوای هێرشەکەی ئەمریکا بۆ سەر سێ ناوەندی ئەتۆمی ڕایگەیاند: ئەمریکا توانای ئێمەی بینی ئەوکاتە بڕیاریدا کە هاوکاری ئیسرائیل بکات چونکە ئەو وڵاتە لاواز بوو. 

 

چیرۆکی سەرەکی: بەرەبەیانی ئەمڕۆ یەکشەممە 22-6-2025، ئەمریکا هێرشێکی بەرفراوانی کردە سەر سێ پێگەی سەرەکی ئەتۆمی ئێران کە 'نەتەنز، ئەسفەهان و فۆردۆ'، دواتر دۆناڵد ترەمپ، سەرۆکی ئەمریکا  لە پلاتفۆرمی سۆشیال تروس ڕایگەیاند، بەسەرکەوتوویی هێرشمان کردە سەر سێ پێگەی ئەتۆمییەکانی ئێران.

 

لێدوانی فەرمی: مەسعود پزیشکیان، سەرۆککۆماری ئێران ڕایگەیاند: ئەمریکا ئەوەی زانی کە ئیسرائیل بەرامبەر ئێران لاواز بووە، هەر بۆیە بڕیاریدا زۆر بەخێرایی بێتە ناو جەنگەکەوە و بەرگریی لەو وڵاتە بکات. 

 

لە بەشێکی دیکەی قسەکانیدا سەرۆککۆماری ئێران ڕایگەیاند: ئێستا کاتی ئەوەیە بە تەواوی تواناکانی خۆمان نیشانی جیهان بدەین، ئەمریکا لە سەرەتا زۆر هەوڵیدا ڕۆڵی خۆی لەو دەستدرێژیانەی ئیسرائیل بشارێتەوە بەڵام زۆری نەخایاند و ڕووی ڕاستەقینەی خۆیان نیشان دا. 

 

زانیاریی زیاتر:  هەر لەگەڵ هێرشەکاندا ڕێکخراوی وزەی ئەتۆمی ئێران ڕایگەیاند، سەرکۆنەی هێرشەکانی ئەمریکا دەکەین و ئەم هەنگاوە پێشێلکردنی یاسا نێودەوڵەتییەکانە.