ئاڤا ناوی سەرۆک لیستەکانی یەکگرتوو و کۆمەڵ بۆ هەڵبژاردنی عێراق ئاشکرا دەکات

ئاڤا نیوز

لایەنە سیاسییەکانی هەرێمی کوردستان لە دوایین ڕۆژ وەک وادەی پێشکەشکردنی کاندیدەکانیان، ئامادەکارییەکانیان چڕکردووەتەوە، یەکگرتوو لە سێ پارێزگا و کۆمەڵ لە چوار پارێزگا لیستیان دەبێت.

 

وێنە گەورەکە: ڕۆژی 11ی مانگی 11ی ئەمساڵ هەڵبژاردنی پەرلەمانی عێراق بەڕێوەبچێت، ئەمڕۆش دوایین وادەی پێشکەشکردنی لیستی کاندیدانە، لایەنە سیاساییەکانی هەرێمی کوردستان دەیانەوێت پێش کۆتایی هاتنی وادەکە لیستەکە پێشکەش بکەن. 

 

زانیاریی تایبەت: یەکگرتووی ئیسلامی کوردستان؛ لە هەرسێ پارێزگای هەولێر، سلێمانی و دهۆک لیستی دەبێت، نزیکەی 30 کاندیدی لەو سێ پارێزگایە داناوە، ئوسامە جەمیل، سەرۆکی لیستەکەیە لە هەولێر، د. موسەننا ئەمین لە سلێمانی و د. جەمال کۆچەر لە دهۆک. لە کەرکووک و نەینەوا لیستیان نابێت.

 

لێدوانی فەرمی: بێستوون حەمە ساڵح، بەرپرسی مەکتەبی هەڵبژاردنی کۆمەڵی دادگەری بە ئاڤای گوت، "ئەمڕۆ لیستی کاندیدانمان لە هەولێر، سلێمانی، دهۆک و کەرکووک پێشکەشکردووە، ژمارەیان 15 کاندیدە، شوان ڕابەر، سەرۆکی لیستی هەولێر، محەممەد حەکیم لە سلێمانی و لە دهۆک وەلید عەزیز سەرۆکی لیست دەبن.

 

زانیاریی زیاتر: بەگوتەی بەرپرسی مەکتەبی هەڵبژاردنی کۆمەڵی دادگەری، هێشتا یەکلایی نەبوونەتەوە لەوەی لە کەرکووک لیستیان هەبێت.