ئیسرائیل ژمارەی زانای ئەتۆمی و بەرپرسە کوژراوەکانی ئێران ئاشکرا دەکات

ئاڤا نیوز

بەرپرسانی ئیسرائیل بۆ ئاژانسی ڕۆیتەرز ئاشكرای دەکەن، لەمیانەی هێرشەکەیان بۆسەر ئێران 11 زانای ئەتۆمی و 30 بەرپرسی پلە باڵای ئەمنییان کوشتووە.

 

چیڕۆکی سەرەکی: دوای ئەوەی سوپای ئیسرائیل لە 13-6-2025، بە فڕۆکەی جەنگی و درۆنەوە، هێرشی کردە سەر ئێران و بۆمبارانی دامەزراوە ئەتۆمییەکان، کارگەکانی دروستکردنی مووشەکی بالیستیی کرد و ژمارەیەک لە سەرکردە سەربازیی و زانایانی ئەتۆمیی ئێرانی بە ئامانج گرت هەر وەک ئیسرائیل بانگەشەی بۆ دەکات ئامانجی ئۆپەراسیۆنە سەربازییەکە ڕێگرییکردن بوو لە هەڕەشە ئەتۆمییەکانی ئێران.

 

زانیاریی بەدەستهاتوو: بەرپرسانی ئیسرائیل بۆ ڕۆیتەرزیان ئاشکرا کردووە، لەماوەی جەنگیان دژ بە ئێران،  توانیوویانە لە ئۆپەراسیۆنەکانیدا 11 زانای ئەتۆمی و 30 بەرپرسی پلە باڵای ئەمنی ئێران بکوژن هاوکات، دەشڵێن هێزەکانیان 900 ئامانجی جۆراوجۆری لەناو خاکی ئێراندا پێکاوە.

 

ژمارەکان وادەڵێن: هەرچەندە پێشتر میدیاکان ژمارەی زانا ئەتۆمییەکانی ئێرانیان ئاشکرا کردبوو کە ژمارەیان نزیکەی 18 کەس بێت، بەڵام ڕۆیتەرز دەڵێت ژمارەیان 11 کەسە.

 

زانیاریی زیاتر: ئەمڕۆ شەممە 28-6-2025 لە ئێران، تەرمی قوربانییانی هێرشەکانی ئیسرائیل بە خاک دەسپێردرێت.

 

ئەوەی پێویستە بیزانیت: دواجار بە هەوڵەکانی دۆناڵد ترەمپ، سەرۆکی ئەمریکا دوای 12 ڕۆژ لە شەڕکردن  لەنێوان ئێران و ئیسرائیل ڕۆژی سێشەممە، 24-06-2025، ئاگربەستی نێوان ئێران و ئیسرائیل چووە بواری جێبەجێکردنەوە.