کێشەی جووتیارانی گوێڕ و دیبەگە چارەسەر دەکرێت

ئاڤا نیوز

بەڕێوەبەری کشتوکاڵی مەخموور دەڵێت، تا ئێستا گەنمی جووتیارانی گوێڕ و دیبەگە وەرنەگیراوە، بەڵام کێشەکەیان چارەسەر دەکرێت و تەنیا بڕیارێکی پێویستە بۆ ئەوەی لە هەولێر یانیش لە سایلۆی مەخموور گەنمەکەیان لێ وەربگیرێت.

وێنە گەورەکە: لە 17ـی ئەم مانگەوە، وەزارەتی بازرگانی عێراق ڕەزامەندی داوە لەسەر پلانی کشتوکاڵی قەزای مەخموور و بڕیاردراوە پرۆسەی وەرگرتنی گەنم دەستپێبکات.

لێدوانی فەرمی: مەروان حوسێن، بەڕێوەبەری کشتوکاڵی مەخموور بە ئاڤا میدیای ڕاگەیاند، ئەو گەنمەی ئێستا لە سایلۆی مەخموور وەردەگیرێت گەنمی جووتیارانی مەخموور و قەراجە و ڕۆژانە 150 بارهەڵگر وەردەگیرێت، سەبارەت بە کێشەی جووتیارانی دیبەگە و گوێڕ تەنیا بڕیارێکی ماوە، یەکلایی دەبێتەوە یان لە سایلۆی مەخموور یانیش لە سایلۆی هەولێر بەمزووانە گەنمەکانیان لێ وەردەگیرێت.

زانیاریی زیاتر: بە وتەی مەروان حوسێن، ئەو گەنمەی لە جووتیارانی دیبەگە و گوێڕ وەردەگیرێت لەسەر پلانی کشتوکاڵی مەخموورە.

ژمارەکان وادەڵێن: بەڕێوەبەری کشتوکاڵی مەخموور ئەوەش دەڵێت: ئێستا 850 بارهەڵگر لای سایلۆی مەخموور وەستاون و ناویان لە 17 لیست تۆمار کراوە، لەماوەی چەند ڕۆژی داهاتوودا گەنمی هەموویان وەردەگیرێت.