کەسێک بەتۆمەتی هەوڵدان بۆ کوشتنی وەزیری بەرگریی ئیسرائیل دەستگیر دەکرێت

ئاڤا نیوز

 

میدیا ئیسرائیلییەکان بڵاویان کردەوە، کەسێک بە تۆمەتی  سیخوڕیکردن بۆ ئێران و دانانی تەقەمەنی لە نزیک ماڵی وەزیری بەرگریی ئیسرائیل دەستگیر کرا.

 

زانیاریی بەدەستهاتوو: کەناڵی 12ـی ئیسرائیل ئاشکرای کرد، هاووڵاتییەکی ئیسرائیلی بەناوی (ڕۆی مزراحی)ـی تەمەن 24 ساڵ، بە تۆمەتی هەوڵدان بۆ کوشتنی ییسرائیل کاتز، وەزیری بەرگریی ئیسرائیل و هاوکاریکردنی ئێران، دەستگیر کراوە.

 

ئەوەش ئاشکرا کراوە، كە مزراحی ویستوویەتی تەقەمەنییە دانراوەكان، لە كاتی تێپەڕینی وەزیری بەرگریی بیتەقێنێتەوە و سیخوڕەکە لە جێبەجێکردنی پلانەکەشی زۆر زۆر نزیک بووە.

 

ئەوەی لەبارەیەوە دەگوترێت: بەرپرسانی ئەمنیی ئیسرائیل بێ خستنەڕووی وردەکاریی زیاتر گوتوویانە، پیلانی تیرۆرکردنی کاتز تاکە پیلان نەبووە، بەڵکو بریکارەکانی ئێران ویستوویانە چەند کەسایەتییەکی دیاری ئیسرائیلیش تیرۆر بكەن.