وەزیری دەرەوەی ئەمریکا دەیەوێت ڕاستەوخۆ لەگەڵ بەرپرسانی ئێران کۆببێتەوە

ئاڤا نیوز

دوای هەفتەیەک لە هێرشەکانی ئەمریکا بۆ سەر دامەزراوە ئەتۆمییەکانی ئێران، بەرپرسانی باڵای کۆشکی سپی بە ئەندامانی ئەنجوومەنی نوێنەرانی ئەمریکایان ڕاگەیاندووە، ئێستا سەرنجیان لەسەر ڕاکێشانی تارانە بۆ سەر مێزی دانوستانەکان.

وێنە گەورەکە: دوای ڕاوەستانی جەنگی نێوان ئیسرائیل و ئێران، هەوڵەکانی ئەمریکا بەردەوامە بۆ دەستپێکردنەوەی دانوستانەکان لەگەڵ ئێران لەبارەی بەرنامە ئەتۆمییەکەی.

زانیاریی بەدەستهاتوو: کەناڵی CNNـی ئەمریکی بڵاویکردووەتەوە، مایکڵ مەککۆل نوێنەری کۆمارییەکان لە ئەنجوومەنی نوێنەرانی ئەمریکا ڕایگەیاندووە، لە نامەیەکی تایبەتدا مارکۆ ڕۆبیۆ، وەزیری دەرەوەی ئەمریکا بە ئەندامانی ئەنجوومەنی نوێنەرانی ئەمریکای وتووە، دەیەوێت یەک بە یەک لەگەڵ سەرکردایەتی ئێران کۆببێتەوە نەک لەڕێگەی لایەنی سێیەمەوە کە مەبەست لێی وڵاتانی عەرەبییە.

لەلایەکی دیکەوە: مایک جۆنسۆن، سەرۆکی ئەنجوومەنی نوێنەرانی ئەمریکا ڕایگەیاند، یەکێک لەو شتانەی لە کۆبوونەوەی ئەنجومەنی نوێنەران باسمان لێوە کردووە ئەوەیە کە ئێستا پێویستمان بە ئێران هەیە بۆ ئەوەی لەگەڵمان بەشداری گفتوگۆیەکی نیازپاکی ڕاستەوخۆ بکات، نەک لە ڕێگەی وڵاتانی دیکەوە دانوستان بکەین، پێویستە لەگەڵ ئێمە لەسەر مێز دابنیشن.