دوو کۆمپانیای ناوخۆیی گەنمی جووتیارانی هەرێمی کوردستان وەردەگرن

ئاڤا نیوز

 

دوای ئەوەی پرۆسەی وەرگرتنی گەنمی جووتیاران لە چوارچێوەی پلانی کشتوکاڵی کۆتایی دێت، بڕیارە ئەو گەنمەی دەمێنێتەوە دوو کۆمپانیای ناوخۆیی وەریانبگرێت.

 

وێنە گەورەکە: ماوەی دوو ساڵە لەسەر ڕاسپاردەی مەسرور بارزانی، سەرۆکوەزیرانی کوردستان ئەو گەنمەی جووتیاران کە دەمێنێتەوە لەلایەن کۆمپانیایە ناوخۆییەکان بە بازاڕ دەکرێت.

 

لێدوانی فەرمی: بەرگەشت ئاکرەیی، وتەبێژی دەستەی وەبەرهێنان بە ئاڤا میدیای وت، دەستەی وەبەرهێنان لیژنەیەکی پێکهێناوە بۆ پرۆسەی وەرگرتنی ئەو بڕە گەنمەی دەمێنێتەوە، ئەمساڵ هەردوو کۆمپانیای خۆشناو و قەیوان گەنمی جووتیاران وەردەگرن. گەنمی پلە یەک بە 550 هەزار دینار و گەنمی پلە دوو بە 525 هەزار دینار لە جووتیاران وەردەگیرێت.

بەرگەشت ئاکرەیی ئەمەشی وت، لە 15-7 پرۆسەکە بۆماوەی یەک مانگ دەستپێدەکات و لە ماوەی دوو مانگیش شایستە داراییەکانیان بۆ خەرج دەکرێت. سیاسەتی کابینەی نۆیەم ئەوەیەم بەرهەمی ناوخۆیی پێداویستی ناوخۆیی پڕ بکاتەوە، ئەوەی دەشمێنێتەوە بۆ دەرەوە هەناردە دەکرێت.

ئەوەی پێویستە بیزانیت: ئەمساڵ لەچوارچێوەی پلانی کشتوکاڵی بەغدا تەنیا 400 هەزار تۆن لە جووتیارانی هەرێمی کوردستان وەردەگرێت، ساڵی پار بەرهەمی گەنمی کوردستان لە یەک ملیۆن تۆن زیاتر بوو، بەڵام ئەمساڵ بەهۆی کەمبارانی چاوەڕێ دەکرێت ئەو ڕێژەیە کەمتر بێت.