حکومەتی عێراق ناحیەیەکی ناوچە کوردستانییەکان دەکاتە قەزا

ئاڤا نیوز

وەزارەتی پلاندانانی عێراق بڕیاری هێنانەکایەی قەزای قەرەتەپەی لە سنووری پارێزگای دیالە دەرکرد، هەردوو ناحیەی جەبارە و کۆکسیش خرانەسەر قەزا تازەکە.

وێنە گەورەکە: قەزای قەرەتەپە، دەكەوێتە باكووری پارێزگای دیالە‌ و بەپێی دەستووری عێراق لە چوارچێوەی ناوچە کێشەلەسەرەکان دایە لەنێوان هەرێمی کوردستان و عێراق، دوای چەند مانگێك لە دەستبەسەرداگرتنی لەلایەن داعشەوە، لە كۆتایی ساڵی 2014ـدا پێشمەرگە و حەشدی شەعبی كۆنترۆڵیانكردەوە، ژمارەی دانیشتووانەکەشی نزیکەی 47 هەزار کەسە.

ڕاگەیێنراوی فەرمی: وەزارەتی پلاندانانی عێراق بڵاویکردەوە، محەممەد عەلی تەمیم، وەزیری پلاندانان دوای وەرگرتنی ڕاپۆرتی فەرمانگەی گەشەپێدان و سەردانی مەیدانی شاندی وەزارەت، بڕیاریدا لەسەر ئەوەی ناحیەی قەرەتەپە لە سنووری قەزای خانەقین هەموو مەرجەکانی بوون بە قەزای تێدایە، بڕیارەکەش جگە لەوەی هاوکار دەبێت بۆ زیادکردنی هەلیکار و خزمەتگوزارییەکان، وەبەرهێنان و داهاتەکانیش لە قەرەتەپەدا زیاتر دەکات.

بەگوێرەی وەزارەتی پلاندانانی عێراق هەردوو ناحیەی جەبارە و کۆکسیش دەخرێنەسەر قەزای قەرەتەپە و  کۆدی کارگێڕیی قەزاکەش لە حکومەتی عێراقدا 2109 دەبێت.