گرفتی جووتیارانی گوێڕ و دیبەگە چارەسەر كرا و گەنمەكەیان لە هەولێر وەردەگیرێت

ئاڤا نیوز

حكومەتی هەرێمی كوردستان بڕیاری دا گەنمی جووتیارانی سنووری گوێڕ و دیبەگە لە سایلۆی هەولێر وەربگیرێت، ئەمەش دوای ئەوەی لەلایەن حكومەتی عێراقەوە لە مەخموور گرفت بۆ بەبازاڕكردنی گەنمەكەیان دروست كرا.

 

چیرۆكی سەرەكی: بەبیانووی ئەوەی هۆبە کشتوکاڵییەکانی بەشێکی ناوچە کوردستانییەکانی سنووری نەینەوا، گرێبەستە کشتوکاڵییەکانیان لەسەر پارێزگای هەولێر و دهۆک کردووە، بە بڕیاری حكومەتی عێراق گەنمی ئەمساڵی جووتیارانی سنووری دیبەگە و گوێڕ تاوەكوو ئێستا لە سایلۆی مەخموور وەرنەگیراوە.

 

لێدوانی فەرمی: هێمن سەید موراد، بەڕێوەبەری گشتیی كشتوكاڵی هەولێر بە ئاڤا میدیای ڕاگەیاند: بەهەوڵی حكومەتی هەرێمی كوردستان گرفتی جووتیارانی دیبەگە و گوێڕ چارەسەر كرا، كە ڕێگەیان پێنەدەدرا بەرهەمی گەنمیان لە سایلۆی مەخموور بەبازاڕ بكەن.

 

- ناوی سەرجەم ئەو جووتیارانەی ئەو گرفتەیان هەیە و لە پلانی بەبازاڕكردن هەن، بە لیست ئاراستەمان دەكرێت و ڕۆژی دووشەممە 7-7-2025، پرۆسەی بەبازاڕكردنی گەنمەكەیان لە سایلۆی هەولێر دەستپێدەكات.

 

- مەرجە جووتیارەكان سەردانی بەڕێوەبەرایەتی و بەشەكانی خۆیان بكەن و بەبێ ئاگاداریی ئەوان سەردانی سایلۆی هەولێر نەكەن چونكە دەبێت ناوەكان بە لیست بۆمان بێت، بۆ ئەوەی زۆر لە سەرەدا نەمێننەوە و كرێی زیاتری بارهەڵگر نەدەن.